Investimet neto në Rumani u rritën me 5% në vit, duke arritur në shifrën 45.76 miliardë RON (mbi 9 miliardë euro) në tremujorin e dytë, me një rritje mesatare prej 5.6% në vit, për dy tremujorët e parë, sipas zyrës së statistikave INS.
Si pjesë e PBB-së së tremujorit, investimet neto u rritën me 11.2% në tremujorin e dytë, nga 10.6% në të njëjtin tremujor të vitit të kaluar.
Nga një këndvështrim më i gjerë, vëllimi i investimeve neto në Rumani u rrit me mbi 16% në bazë vjetore vitin e kaluar, pasi kompanitë u treguan të kujdesshme në vitin 2022, për shkak të luftës në Ukrainë.
Vëllimi i investimeve në ndërtime u rrit vetëm me 2% në tremujorin e dytë të këtij viti, ndërsa pajisjet e reja (përfshirë mjetet e transportit), tërhoqën 12% më shumë investime krahasuar me të njëjtën periudhë të vitit të kaluar. Shpenzimet në investime të tjera (marka, kërkim dhe zhvillim) u rritën me 4.4% në terma realë në vit.
Për rrjedhojë, pesha e investimeve në pajisje u rrit në 28.9% në tremujorin e dytë, krahasuar me 28.2% një vit më parë. Investimet në ndërtime mbeten mbizotëruese, me 63.4% të totalit në tremujorin e dytë (64.8% në TM2 2023).
Sipas sektorëve të ekonomisë, për të gjithë gjashtëmujorin e parë, pesha e investimeve të kompanive të ndërtimit dhe prodhimit, u ul në krahasim me vitin 2023, në përkatësisht 40.6% dhe 19.2% (nga përkatësisht 45.5% dhe 20.1%, në gjashtëmujorin e parë të vitit 2023).
Kompanitë në tregti dhe shërbime ishin më aktive për sa u përket investimeve këtë vit (20.8% e totalit të investimeve, nga 19.4% në gjashtëmujorin e parë të vitit 2023).
Sektorët e tjerë patën një peshë dukshëm më të madhe në totalin e investimeve (15.6% e totalit, nga 11.2% në gjashtëmujorin e parë të vitit 2023).
Postimi ” Investimet u rritën me 5% në vit në tremujorin e dytë ” eshte marre nga Revista Monitor.
