Rreth tre vite nga themelimi i saj, shoqëria “SENA Solar Energy of Albania”, që zotërohet nga Korporata Elektroenergjetike Shqiptare ka paraqitur pranë Ministrisë së Infrastrukturës dhe Energjisë, aplikimin për ndërtimin e një impianti fotovoltaik lundrues në Vaun e Dejës.
Impianti do të pozicionohet në rezervuarin e hidrocentralit të Vaut të Dejës dhe parashikohet të ketë një kapacitet të instaluar 13.8 MW.
Shoqëria SENA u krijua në mars të vitit 2021, në kuadër të marrëveshjes së financimit për ndërtimin e këtij impianti lundrues ndërmjet KESH dhe Bankës Evropiane për Rindërtim dhe Zhvillim. Fokusi kryesor i shoqërisë është zhvillimi dhe operimi i impiantit fotovoltaik lundrues në Vaun e Dejës, por jo vetëm.
Kjo, pasi shoqëria ka objektiv të aktivitetit edhe prodhimin, shitjen, tregtimin apo studimin e gjitha shërbimeve mbështetëse në fushën e industrisë dhe energjisë; kryerjen e aktiviteteve tregtare në fushën e energjisë, etj.
Ndërtimi i impaintit diellor lundrues është një nga projektet e KESH, në kuadër të diversifikimit të burimeve të prodhimit të energjisë. Aktualisht kompania publike e prodhimit të energjisë zotëron vetëm një impaint diellor prej 5.14 MWp të pozicionuar në digën e Qyrsaqit, në Vaun e Dejës, ndërsa pjesja tjetër e aseteve gjeneruese përfshin 3 HEC-et e Kaskadës së Drinit.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
