Pas përmirësimit të situatës në Kaskadën e Drinit si pasojë e reshjeve të shiut, Korporata Elektroenergjetike Shqiptare iu është rikthyer eksporteve të energjisë, duke gjeneruar të ardhura për kompaninë.
Në total në 2 ditët e fundit janë realizuar 2 procedura shitjeje, teksa sipas përllogaritjeve të TV janë siguruar 4.5 mln euro. Sipas të dhënave të publikuara nga KESH në total janë shitur 38 mijë mWh energji, ndërkohë që çmimi mesatar me të cilin është eksportuar është rreth 119 euro/ mWh.
Këto procedura vijnë pas disaj muajsh importi energjie për plotësimin e nevojva konsumatore. KESH nisi blerjet e energjisë në gjysmën e dytë të vitit, ndërkohë që deri në muajin qershor prodhimi në kaskadë mundësoi nevojat vendase për energji elektrike, teksa paralelisht u kryen edhe një sërë procedurash për shitjen e energjisë.
Nga mbiprodhimi në Kaskadë, deri në muajin qershor KESH arkëtoi rreth 41.5 mln euro, ndërkohë që nëse i shtojmë dhe të ardhurat e siguruara me 2 procedurat e fundit, kjo vlerë shkon në 46 mln euro.
Kjo situatë e ka vendosur në pozita të favorshme korporatën, duke qenë se edhe fatura për blerjen e energjisë deri më tani ka shkuar në 49 mln euro, një vlerë shumëfish më e ulët se ajo e vitit të kaluar, që arriti në 504 mln euro.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
