Korporata Elektroenergjetike Shqiptare e ka shitur energjinë 150% më lirë se çmimet në Bursën e Hungarisë. Të hënën KESH njoftoi se shiti një sasi të vogël, prej 8 040 mWh, teksa çmimi me të cilin u shit energjia varion nga 73 euro/mWh në 101 euro/ mWh.
Ndërkaq, çmimet në Bursën e Hungarisë, që shërben si referencë për transaksionet në vendin tonë pësuan rritje me gati 20% në sesionin e të hënës, duke arritur në gati 250 euro/mWh. KESH nxorri për shitje 19 200 mWh, por vetëm 45% e kësaj sasie u shit.
Tenderi u realizua pas shtimit të prurjeve në Kaskadën e Drinit, si pasojë e reshjeve të shiut, teksa vetëm 10 ditë më parë KESH bleu 42 500 mËh energji, me një çmim mesatar prej 228 euro/mWh, duke shpenzuar gati 10 mln euro.
Më herët ministrja e Infrastrukturës dhe Energjisë, Belinda Balluku ka thënë se parashikimet e motit lejojnë të hartohen plane 2 – javore, por pavarësisht kësaj transaksionet e blerjeve janë kryer.
Shpjegimi për këtë situatë u dha nga kryeministri, Edi Rama, i cili përmes një postimi në rrjetet sociale komentoi se importi i energjsë elektrike sipas procedurës së datës 11 nëntor, u bë sepse nga të gjitha parashikimet e motit, situata e reshjeve pritej të intensifikohej vetëm në mesditën e datës 20 nëntor.
“Nëse nuk do të ishte importuar, rezerva energjetike do të ishte në minimalen historike, duke rrezikuar vetë furnizimin normal me energji”, – komentoi Rama. Gjithsesi, niveli i rezervës energjetike, në datën 8 nëntor sipas KESH, ishte 436 GWh, ndërkohë që nëntorin e vitit të kalaur rezerva ishte edhe më e ulët duke u regjistruar në 426 GWh.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
