Serbia është shteti i fundit që i është bashkuar bojkotit të supermarketeve, një prirje që filloi në Kroaci dhe u përhap shpejt në vendet e tjera të Ballkanit Perëndimor.
Shoqata për Mbrojtjen e Konsumatorit, Efektiva, u bëri thirrje konsumatorëve në Serbi të bojkotojnë pesë zinxhirë të mëdhenj të shitjes me pakicë, për shkak të çmimeve të tyre tepër të larta.
Bojkoti synon zinxhirët e supermarketeve Delhaize, Mercator, Univerexport, DIS dhe Lidl. Efektiva tha se është normale që çmimet të rriten për shkak të inflacionit, por jo nga sasia që reflektohet në etiketat e çmimeve të dyqaneve.
Nisma për bojkot u nis fillimisht nga grupi kroat i të drejtave të konsumatorëve, Halo, Inspektore (Përshëndetje, Inspektor) në fund të janarit. Grupi kishte shpallur një bojkot njëjavor të rrjeteve të supermarketeve Eurospin, Lidl dhe DM.
Lëvizja u përhap edhe në vende të tjera të Ballkanit Perëndimor, duke përfshirë Bosnjë -Herzgovinën, Malin e Zi, Maqedoninë e Veriut, Slloveninë dhe është paralajmëruar edhe në Kosovë.
Paralajmërohet bojkotimi i marketeve edhe në Kosovë
Suksesi i një bojkoti varet nga disa faktorë, sipas Veljko Mijušković, profesor në Fakultetin Ekonomik të Universitetit të Beogradit.
Ai tha se faktorët përfshijnë kohëzgjatjen e bojkotit, nivelin e veprimit kolektiv të konsumatorëve dhe reagimin e zinxhirit të shitjes me pakicë ndaj bojkotit.
Ai shtoi se ekspertët kanë kërkuar që të bëhet një hetim dhe analizë për përllogaritjen e vlerave së shtuar, sipas tij duhet të bëhet e qartë “ku ka rritje të çmimit që bën që konsumatorët finalë të paguajnë dukshëm më shumë për një lloj produkti këtu (në Serbi) në krahasim me vendet e tjera”.
Ekspertët thanë se rruga për uljen e çmimeve të dyqaneve varet nga qeveria. Vetëm ata mund të vendosin subvencione për artikujt ushqimorë bazë, të lehtësojnë futjen e shitësve të rinj në treg dhe të ulin varësinë nga mallrat e importuara duke inkurajuar prodhimin vendas./ Euronews
Postimi ” Konsumatorët serbë i bashkohen bojkotit të supermarketeve në shenjë proteste ndaj rritjes së çmimeve ” eshte marre nga Revista Monitor.
