300 kredi me 0% interes do të ndahen për kategori të caktuara të administratës publike. Sipas vendimit të botuar në Fletoren Zyrtare, këto kredi do të ndahen përkatësisht, 100 për mjekët e Sistemit Shëndetësor Publik, 100 për punonjësit e Policisë së Shtetit dhe 100 për ushtarakët e Forcave të Armatosura.
Referuar vendimit për punonjësit e Policisë së Shtetit dhe Forcave të Armatosura, përfitues janë familjet e reja të krijuara si rezultat i martesës së lidhur përpara nëpunësit të gjendjes civile dhe se përzgjidhen në bazë të sisetmit të pikëzimit.
Por cilat janë kriteret e pikëzimit? Për të qenë përfitues duhet të përmbushësh kushtin kryesor të 100 pikëve dhe 50 pikë ndahen për kushtet e strehimit që do të thotë, aplikuesi për kredi me 0% interes nuk disponon një banesë në pronësi, banojnë në banesa në rrezik shëmbjeje, në banesa të mbipopulluara, familjet që humbasin banesën e tyre si pasojë e një vendimi gjyqësor ose janë familje që banojnë në banesa që prishen ose përjashtohen nga procesi i legalizimit.
Ndërsa 50 pikët e tjera përllogariten për kushtet familjare apo sociale. Dhe për t’i përmbushur këto pikë, aplikantët duhet të kenë pagën më të ulët sipas përcaktimit të vendimit të Këshillit të Ministrave si dhe në momentin e aplikimit të kenë jo më pak se 2 vite të punësuar në administratën publike.
Edhe mjekët e sistemit shëndetësor publik që të përfitojnë kredi me 0% interes duhet të përmbushin kushtin e pikëzimit me 100 pikë. Në kriteret e strehimit duhet të përmbushin 50 pikë njësoj si punonjësit e Policisë së Shtetit dhe Forcave të Armatosura, por 50 pikët e tjera duhet të përmbushen në të tjera kritere.
Vetëdeklarimi që është i angazhuar në institucionin shëndetësor publik në një ose më shumë kategoritë e mëposhtme. Së pari të jetë mjek i punësuar në sistemin shëndetësor publik dhe që ka nënshkruar marrëveshje me Ministrinë e Shëndetësisë, Ministrinë e Arsmit dhe Universitetin e Tiranës dhe ushtron profesionin pas përfundimit të ciklit të dytë të studimeve për “Mjekësi të Përgjithshme” gjithashtu kriter tjetër është për ata mjekë që ushtrojnë profesionin pas përfundimit të ciklit të specializimit në shërbimin spitalor me kontratë pune sipas legjislacionit në fuqi.
Përfitues janë edhe ata mjekë të cilët kanë kontratë pune sipas legjislacionit në fuqi që punojnë mbi 80 km larg vendbanimit si dhe mjekët e punësuar në institucionet shëndetësore publike me kontratë pune me afat të pacaktuar.
Diamila Leka/ Scan
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
