Pas rritjes së pagave, punonjësit e administratës publike do mund të marrin “kredi të butë” për të blerë shtëpi. Kjo do të thotë financim me afat shlyerje deri në 30 vite, me normë interesi vetëm 3 për qind dhe të pandryshueshme për të gjithë kohën. Gjithashtu përfituesit nuk paguajnë komision administrimi dhe nuk kanë nevojë për një garantor.
![](https://wallstreet.al/ngarkuara/Kredi-te-buta-per-Administraten-norme-interesi-3-me-afat.jpg)
“Nëse do ta analizojmë në aspektin makro duhet të themi se këto para’ gjithsesi shtyjnë ekonominë e vendit, pasi fundja këtu shpenzohen. Nëse duhet ta shohim në mikro, pra në aspektin familjar, kjo është një politikë mbështetëse sociale pasi kredia merret e kosto shumë të lehtësuara”, tha pedagogia e Ekonomisë, Teuta Nunaj.
Marrja e një kredie të butë bëhet veçanërisht e leverdishme në ditët e sotme, si pasojë e rritjes së normave të interesit. Nëse një çift i ri merr 4 milionë lekë hua me afat 30 vite nëpërmjet “kredisë së butë” të subvencionuar nga qeveria do duhet të paguajë çdo muaj më pak se 19 mijë lekë.
Nëse merr po të njëjtën shumë në një bankë të nivelit të dytë, aktualisht me një normë interesi sot rreth 6.5 për qind, ajo që duhet kthyer në fund të çdo muaj i kalon 27 mijë lekët.
![](https://wallstreet.al/ngarkuara/1688671307_565_Kredi-te-buta-per-Administraten-norme-interesi-3-me-afat.jpg)
Po a mund të shtrihet kjo politikë edhe përtej punonjësve të administratës?
“Do të ishte shumë e vështirë që të shtrihej edhe në të tjera kategori. Kjo pasi në një farë mënyre qeveria do të merrte atributet e bankave duke dëmtuar këto të fundit”, shtoi Nunaj.
![](https://wallstreet.al/ngarkuara/1688671307_740_Kredi-te-buta-per-Administraten-norme-interesi-3-me-afat.jpg)
Për të përfituar nga politika e strehimit social të martuar në Parlament në fund të muajit të shkuar, ata që punojnë në shtet duhet të kenë një kontratë afatgjatë. Gjithashtu ata duhet të mos kenë banesë në emër të tyre apo familjarëve dhe të kenë të ardhura të mjaftueshme për të shlyer kredinë, por më pak se 135 mijë lekë në muaj.
Burimi: A2 CNN