Kreditimi i ekonomisë iu kthye rritjes në muajin shtator, pas një ngadalësimi të lehtë në dy muajt paraardhës.
Sipas të dhënave nga Banka e Shqipërisë, kredia e re për shtatorin kishte vlerën e 34.2 miliardë lekëve, në rritje me 20.8% krahasuar me të njëjtën periudhë të një viti më parë.
Gjithsej, për 9-mujorin e vitit 2025 sektori bankar ka dhënë gjithsej 306.8 miliardë lekë kredi për ekonominë, në rritje me 9.3% krahasuar me të njëjtën periudhë të vitit të kaluar. Kredia e re e disbursuar nga sektori bankar këtë vit është në vlerat më të larta historike, por megjithatë ritmi i rritjes është më i ngadaltë krahasuar me vitin e kaluar.
Shtysa kryesore për rritjen e tregut këtë vit po vjen nga segmenti i individëve. Për 9-mujorin, bankat kanë disbursuar gjithsej 95.4 miliardë lekë kredi për individët, me një rritje prej 23.4% krahasuar me të njëjtën periudhë të një viti më parë. Që nga muaji korrik i këtij viti, kanë hyrë në fuqi disa masa kufizuese të vendosura nga Banka e Shqipërisë lidhur me kredinë për blerje banese. Bankat duhet t’u përmbahen disa kritereve të administrimit të rrezikut, të lidhura me raportin mes borxhit dhe të ardhurave, si edhe me atë mes huasë dhe vlerës së pronës që financohet. Megjithatë, efekti i këtyre masave për momentin nuk duket të jetë drastik. Huaja për individë në tërësi u rrit me 19.9% për shtatorin, ndërsa huaja për blerje banesash u rrit me ritëm edhe më të lartë, me 25.5% më shumë krahasuar me shtatorin e vitit të kaluar.
Kreditimi po shfaq rritje pozitive edhe në segmentin e biznesit, por me ritme më të ngadalta krahasuar me vitin e kaluar. Për nëntë muaj, bankat dhanë gjithsej 206.7 miliardë lekë kredi për ndërmarrjet private, me një rritje prej 2% krahasuar me të njëjtën periudhë të vitit të kaluar. Tendenca e kreditimit të biznesit është në përmirësim të dukshëm në muajt e fundit. Për shtatorin, vlera e kredisë së re arriti në 24.6 miliardë lekë, në rritje me 25% krahasuar me shtatorin e vitit të kaluar.
Kreditimi i ekonomisë vazhdon të rritet edhe i matur si tepricë totale.
Vlera e portofolit të kredisë për ekonominë arriti në 901.6 miliardë lekë, me një rritje prej afërsisht 1.1 miliardë lekësh krahasuar me gushtin. Me bazë vjetore, kredia ngelet në nivele dyshifrore, me 10.9% më shumë krahasuar me të njëjtën periudhë të vitit të kaluar.
Rritja e portofolit po mbështetet në masën më të madhe te segmenti i individëve, me një rritje vjetore pranë nivelit të 17.2%. Megjithatë, edhe rritja e portofolit i kredisë për bizneset po përshpejtohet edhe në fund të shtatorit kjo rritje arriti në 8% krahasuar me një vit më parë.
Burimi: Banka e Shqipërisë
Postimi ” Kredia për ekonominë iu kthye rritjes në muajin shtator ” eshte marre nga Revista Monitor.
