Huadhënia për ekonominë po shfaq shenja ngadalësimi, duke reflektuar efektet e krizës së shkaktuar nga shtrenjtimi i çmimeve dhe rritja e interesave në kërkesën për kredi.
Në muajin tetor, bankat dhanë për bizneset dhe individët rreth 19.2 miliardë lekë kredi, sipas statistikave të Bankës së Shqipërisë.
Në krahasim me të njëjtën periudhë të një viti më parë, kredia e re ka rënë me 15%. Huaja e re që kanë dhënë bankat në tetor ishte dhe më e ulëta që nga muaji shkurt i këtij viti.
Megjithatë, ecuria e huadhënies duket e qëndrueshme dhe 10-mujori po vazhdon të shënojë nivelet më të larta të shtatë viteve të fundit.
Vlera totale e kredive të disbursuara për periudhën janar-tetor arriti në 227.7 miliardë lekë, në rritje me 15.5% krahasuar me të njëjtën periudhë të vitit të kaluar. Gjithsesi tendenca paraqitet në ngadalësim, teksa për 9 mujorin, rritja ishte 19.6%.
Rolin kryesor në rritjen e kredisë këtë vit po e luan ecuria e mirë në segmentin më të madh të tregut, atë të ndërmarrjeve private.
Sipas Bankës së Shqipërisë, kredia për bizneset në dhjetë muaj arriti në 151 miliardë lekë, në rritje me 16.39% krahasuar me të njëjtën periudhë të një viti më parë.
Biznesi këtë vit po merr më shumë kredi si për financimin e nevojave afatshkurtra për likuiditet, ashtu edhe për kryerjen e investimeve të reja. Rritja e kredisë për kapital punues mund të jetë rezultat i rritjes së çmimeve dhe nevojave për më shumë mjete për blerjen e mallrave, lëndëve të para apo marrjen e shërbimeve.
Por, paralelisht edhe kredia për blerje të makineri-pajisjeve dhe për blerjen apo zhvillimin e pasurive të paluajtshme po rritet. Ky është një tregues i tërthortë se projektet e investimit po vijojnë, pavarësisht perspektivave më pesimiste ekonomike.
Kreditimi vazhdon të rritet me ritme dyshifrore edhe në segmentin e individëve, ndonëse tendenca po vjen në ngadalësim.
Për dhjetë mujorin, bankat disbursuan rreth 71.2 miliardë lekë hua, në rritje me 12.8 krahasuar me vitin e kaluar, nga 15.6%, që kishte qenë zgjerimi për 9 mujorin. Rritja në portofolin e individëve këtë vit paraqitet më e ngadaltë në raport me vitin e kaluar.
Huaja për blerje banesash vijon të ketë rritje të fortë, por monedha e preferuar mbetet euro. Për 10 mujorin, kredia për banesa për individë u rrit me 41.8% me bazë vjetore, duke përbërë 26% të totalit të huasë së dhënë gjithsej për individët.
Ndërsa huaja për banesa në lekë shënoi një rritje minimale prej vetëm 4.3%. Shtrenjtimi i banesave që rrit shumën minimale që duhet marrë hua dhe zgjerimi i tregut të pasurive të paluajtshme, sidomos në kryeqytet vlerësohen si arsyet kryesore që kanë nxitur këtë tendencë.
Postimi ” Kredia për ekonominë ngadalësohet për të dytin muaj radhazi ” eshte marre nga Revista Monitor.
