Ministrja e Bujqësisë dhe Zhvillimit Rural, Frida Krifca gjatë pjesëmarrjes së saj në panairin ndërkombëtar “Ditët e Bujqësisë 2023” u shpreh se qeveria ka filluar bashkëbisedimin për të finalizuar procedurat për hapjen e programit të ri IPARD III i cili do të injektojë 146 milion Euro në bujqësinë shqiptare deri në vitin 2027.
Sipas njoftimit për media përtej masave të aplikuara në programin IPARD II për investime të në infrastrukturë bujqësore dhe agropërpunuese, në programin IPARD III do të mbështesim raca autoktone, të rivitalizojnë agrosistemet tradicionale, si për shembull ullishtat tradicionale, të rrisin sipërfaqet e certifikuara apo të shfrytëzojnë në mënyrë të qëndrueshme i kullotat, burimet peshkore dhe të akuakulturës”.
“Këtë herë i drejtohemi në mënyrë të dedikuar sektorëve të rinj që marrin fokus kryesor të tillë si: sektori i Ullirit dhe vajit të Ullirit; bimët mjekësore dhe aromatike dhe përpunimi i produkteve të peshkimit etj,” tha ajo. Ajo ftoi fermerët të shohin me prioritet sektorë të rëndësishëm si ai i prodhimit dhe përpunimit të ullirit, bimë mjekësore dhe aromatike dhe produktet e peshkimit”.
Krifca bëri të ditur për fermerët risitë e bashkëpunimit me Bankën Botërore, duke theksuar se, “kemi filluar aplikimin e një projekti të ri me Bankën Botërore, që jep zgjidhje inteligjente të problemeve që has sot bujqësia jonë”, më konkretisht:
- rritja e aksesit në ujitje, e cila përdor në mënyrë optimale ujin,
- ulja e kostove të ujitjes dhe kullimit, përmes përdorimit të energjisë alternative,
- përdorimi i bujqësisë inteligjente për uljen e kostove të prodhimit përmes përdorimit të sensorëve,
- tregjet për fermerët e vegjël dhe lidhjen e tyre me hotelet dhe restorantet e zonës,
- Promovimin e produkteve tipike etj.
Në njoftim thuhet se këto mundësi dhe teknika të reja do të aplikohen para së gjithash në zonën e Lushnjës dhe Divjakës, ku do të rivitalizohet një pjesë e skemës ujitëse së Lushnjës dhe do të aplikohet ujitja me presion për 500 ha në zonën e Divjakës.
Panairi “Ditët e Bujqësisë 2023” zhvillohet me 27-28-29 Prill dhe do të jetë një urë lidhëse mes bizneseve, profesionistëve dhe mundësive të reja të zhvillimit të agrikulturës, peshkimit dhe blegtorisë dhe fokusi kryesor do të jetë eksporti i prodhimeve bujqësore, bujqësia e qëndrueshme si dhe rritja e standardeve të agrobizneseve dhe sektorëve të tjerë të përfshirë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
