Kriza e nxitur nga dështimet e disa bankave në Shtetet e Bashkuara të Amerikës, po vazhdon të korrë frikë dhe panik edhe në tregjet europiane, ku aksionet në bursë të grupeve kryesore bankare, kanë pësuar një rënie mujore deri në ¼ e vlerës.
Por sipas gazetarit dhe ekspertit Gjergj Erebara, sistemi bankar shqiptar jo vetëm është i mbrojtur nga kriza, por po përfiton nga rritja e interesave.
Teksa bankat qendrore po vazhdojnë t’i japin prioritet stabilitetit të çmimeve, normat bazë të interesit po përkthehen në kosto më të larta të huamarrjes. Këtu, vendi ynë është pashmangshmërisht i pambrojtur, duke konsideruar edhe planin e qeverisë për të dalë në tregje me një eurobond të ri.
Në vitin 2021, Shqipëria emetoi me sukses një eurobond prej 650 milionë eurosh për 10 vite me një interes 3.75%. Në fillim të vitit, Serbia, që ka një vlerësim rreziku edhe më të mirë se sa vendi ynë, kreu një operacion të ngjashëm që rezultoi në një interes prej 6.5%. Ndërsa Maqedonia e Veriut, doli në tregje vetëm 4 javë më parë, ku për një periudhë 4-vjeçari arriti një interes prej gati 7%.
Burimi: A2 CNN
