Qeveria kroate ka paraqitur një paketë masash prej 248 milionë eurosh (275 milionë dollarë), që synon zbutjen e ndikimit të rritjes së çmimeve për familjet dhe bizneset, gjatë gjashtë muajve të ardhshëm, tha kryeministri kroat Andrej Plenkoviç.
“Paketa ka dy përparësi: të mbajë çmimin e energjisë të ulët dhe të mbrojë ata që janë më të rrezikuar”, tha Plenkoviç në një seancë qeveritare.
Sipas paketës, qeveria do të ruajë subvencionet për energjinë elektrike dhe gazin, për qytetarët, publikun dhe sektorët jofitimprurës. Ndërkohë, ajo do të sigurojë edhe një kupon prej 70 eurosh për afro 90 mijë persona që konsiderohen si blerës të pambrojtur të energjisë, si dhe do t’u jepet një mbështetje shtesë nga 70 deri në 540 euro në muaj, ofruesve të shërbimeve sociale.
Për më tepër, pensionistët do të marrin një mbështetje mujore që varion nga 60 deri në 160 euro dhe nga kjo masë do të përfitojnë rreth 760,000 pensionistë në Kroaci, tha Plenkoviç.
Qeveria do të ndajë edhe 4.5 milionë euro për mbështetjen financiare të studentëve, duke siguruar që çmimi i vakteve të studentëve të mos rritet mbi 20%. Për më tepër, rreth 13,000 veteranë kroatë të papunë do të marrin një kompensim prej 100 eurosh për të ndihmuar me zbutjen e kostos së jetesës.
Kjo ishte paketa e shtatë e masave që ka miratuar qeveria kroate për të mbrojtur familjet dhe ekonominë nga rritja e çmimeve. Norma e inflacionit vjetor në Kroaci ishte 1.8% në gusht dhe Plenkoviç tha se kjo ishte norma më e ulët e inflacionit në tre vitet e fundit.
Postimi ” Kroacia paketë të re masash për të zbutur rritjen e çmimeve ” eshte marre nga Revista Monitor.
