Kur unë komunikoj, me kuptojnë të tjerët? Kur unë komunikoj, arrij të pëcjell mesazhin që dua? Kur unë komunikoj…
Unë kam patur fatin të vizitoj gati 60 vende – duke studiuar në një për të paktën 4 vite dhe duke jetuar në kulturë krejt e ndryshme nga e imja. Zhytja në një kulturë tjetër është një përvojë që të hap sytë. Të jetuarit mes dy kulturave ka formuar atë që jam dhe ka patur një ndikim të rëndësishëm në identitetin tim. Është një eksperiencë ndryshe të komunikosh në gjuhë tjetër nga ajo e përditshmja, nga ajo që komunikon me familjen dhe të afërmit. Ama ajo ç’ka dua unë të komunikoj ka tjetër emocion dhe tjetër përcjellshmëri në gjuhë tjetër.
Shpesh dëgjojmë për “botën duke u bërë një vend më i vogël” fal teknologjisë dhe globalizimit. Në këtë kontekst, kulturat po ndërlidhen gjithnjë e më shumë dhe dallimet po zvogëlohen. Ndërsa mësojmë për kultura të ndryshme, vlen të përmendet se të gjithë ne jemi individë, individë që ndajmë përvoja jetësore në gjuhë të ndryshme por me histori të njëjta.
Nga këtu nis dhe nevoja për te biseduar me të tjerët. Por përse është kaq primare komunikimi?
Të jesh në gjendje të komunikosh është më e rëndësishmja nga të gjitha aftësitë e jetës. Të mësuarit rreth kulturave të tjera na ndihmon të kuptojmë perspektiva të ndryshme brenda botës në të cilën jetojmë dhe ndihmon në largimin e stereotipeve negative dhe paragjykimeve personale rreth grupeve të ndryshme.
“Komunikimi është zgjidhës i të gjitha problemeve dhe është themeli për zhvillimin personal.” Më pëlqen ky citim, jo vetëm sepse është i thjeshtë dhe i saktë, por sepse është 100% i vërtetë. Aftësia jonë për të komunikuar do të ndikojë drejtpërdrejt në gjithçka që bëjmë.
Vazhdoni, provojeni. Kur ndaloni në kafenenë tuaj të preferuar për të marrë kafen e mëngjesit, përshëndeteni baristën me një buzëqeshje. Ose kur blini ushqimet tuaja nga supermarketi i lagjes, kërkoni emrin e arkëtarit. Nuk duhet patur ndrojtje për të filluar një bisedë.
Ndoshta ka patur një kohë kur njerzit mund të kishin sukses në jetë pa komunikuar me të tjerët. Nuk e besoj, por nëse po, atëherë ajo kohë ka kaluar. Nuk mjafton vetëm të punosh shumë. Nuk mjafton të bësh një punë të shkëlqyer. Për të qenë i suksesshëm, duhet të mësojmë se si të komunikojmë vërtet me të tjerët.
Të gjithë komunikojnë. Tani, ka ardhur koha për të krijuar disa lidhje të qëndrueshme përmes komunikimit efektiv!
Audrey Kola
Programi i studimit: Komunikim dhe Marrëdhënie me Publikun
Universiteti Mesdhetar i Shqipërisë
