Rezervimet për lundrimin e vitit 2025 do të fillojnë më datën 10 nëntor
Azamara po u ofron udhëtarëve mundësinë për të vizituar dhjetëra vende anembanë globit, pa pasur nevojë që të bëjnë gati valixhet më shumë sesa një herë, në lundrimin e saj të ri rreth botës me kroçerë për vitin 2025.
Kroçera do të niset nga San Diego dhe do të përfundojë lundrimin e saj në Mbretërinë e Bashkuar, duke ndaluar në një total prej 37 vendesh, deklaroi kompania për Travel + Leisure. Lundrimi do të zhvillohet në rreth 155 net dhe përfshin 46 ndalesa në orët e vona të natës ose përgjatë gjithë natës, në mënyrë që vizitorët të mund të zhyten tërësisht në atmosferën e destinacionit.
“Plot 60% e porteve në këtë lundrim do të jenë të ndryshme nga ato të udhëtimit tonë botëror për vitin 2024. Ky itinerar është konceptuar me kujdes për t’u dhënë edhe udhëtarëve me më shumë eksperiencë, një perspektivë krejtësisht të re për botën,” tha Carol Cabezas, presidenti i Azamara, në një deklaratë të dhënë për Travel + Leisure.
“Udhëtimi ynë botëror me kroçerë për vitin 2025 fton udhëtarët jo vetëm për të parë botën, por edhe për të kaluar një kohë të mirë në çdo destinacion dhe për të pasur kujtime që do të zgjasin për shumë kohë pas përfundimit të udhëtimit.”
Rezervimet për lundrimin e vitit 2025 do të fillojnë më datën 10 nëntor.
Ky është lundrimi i dytë nëpër botë që kompania ka zgjedhur për të zhvilluar në Azamara Onward, e cila u pagëzua me këtë emër në maj të vitit 2022 dhe mund të mbajë deri në 684 persona në bordin e vet.
Vizitorët do të udhëtojnë drejt destinacioneve anembanë globit, nga Honolulu në Sidnej, Bangkok, Bali dhe më gjerë. Lundrimi do të përfshijë gjithashtu 13 aktivitete të ndryshme falas në tokë, të tilla si vizita në tempullin më të madh budist në botë, në Semarang të Indonezisë, i cili daton që nga shekulli IX, si dhe përjetimin e një feste gala në fillimin e këtij udhëtimi në San Diego.
Si pjesë e lundrimit me kroçerë, udhëtarët do të marrin gjithashtu 4,000 dollarë për t’u shpenzuar në bordin e anijes, 3,000 dollarë për t’i shpenzuar në ekskursione në breg, bileta ajrore të klasit biznes vajtje-ardhje, një paketë pijesh premium për dy persona, si dhe shërbim javor për lavanderinë.
Lundrimi rreth botës për vitin 2025 po ofrohet pasi rezervimet për versionin e lundrimit të planifikuar për vitin 2024 u mbyllën, sepse çdo biletë u shit. Edhe ky lundrim do të zhvillohet gjithashtu gjatë 155 netëve ku do të vizitohen 40 vende në gjashtë kontinente, nëpërmjet kroçerës Azamara Onward.
Sipas kompanisë, Azamara ka në plan të heqë kërkesat për vaksinën e detyrueshme nga të gjitha lundrimet që fillojnë dhe mbarojnë në Shtetet e Bashkuara, më datë 1 dhjetor, dhe për të gjitha lundrimet që fillojnë dhe mbarojnë në Europë, më datë 11 mars të vitit 2023. Të gjitha lundrimet e tjera e kanë të detyrueshme të pasurin e një dëshmie të vaksinimit dhe marrjen e dozës përforcuese.
Postimi ” Lundrimi 155 ditë rreth botës, në 37 vende! ” eshte marre nga Revista Monitor.
