Malta njoftoi të hënën ulje taksash për prindërit me dy ose më shumë fëmijë, në një përpjekje të qeverisë për të kundërshtuar rënien demografike të vendit.
Ministri i Financave, Clyde Caruana, i tha parlamentit se norma shumë e ulët e lindshmërisë së popullsisë vendase të ishullit mesdhetar ishte “sfida më e madhe” me të cilën përballet vendi.
Një raport i këtij viti i agjencisë statistikore të BE-së, Eurostat, tregoi se Malta kishte normën më të ulët të lindshmërisë në Bashkimin Europian në vitin 2023, me vetëm 1.06 lindje për grua.
Në shtator, kryeipeshkvi katolik i Maltës, Charles Scicluna, deklaroi se vendi po përballet me “zhdukje etnike”.
Megjithëse është një vend me dendësi të lartë banimi, rreth 1,704 banorë për kilometër katror, pothuajse një e treta e popullsisë së Maltës përbëhet nga punëtorë të huaj dhe familjet e tyre.
Caruana tha se, duke filluar nga viti 2026, prindërit me dy ose më shumë fëmijë nuk do të paguajnë tatim mbi të ardhurat për 18,500 eurot e para të të ardhurave të tyre.
Kjo shumë do të rritet në 30,000 euro për secilin prind deri në vitin 2028. Uljet e taksave do të mbeten në fuqi deri sa fëmijët të mbushin 23 vjeç.
Skema është e ngjashme me një tjetër të shpallur në Poloni në shtator, e cila do të heqë tatimin për familjet me të paktën dy fëmijë dhe me të ardhura deri në 32,973 euro.
Caruana deklaroi në shkurt se popullsia vendase e Maltës është aktualisht 406,000 banorë, prej të cilëve 24% janë mbi 65 vjeç.
Në fjalimin e tij për buxhetin, Ministri i Financave tha se parashikohet që ekonomia e Maltës të ketë një rritje reale të PBB-së 4.1% në vitin 2026, në një nivel të ngjashëm me atë të vitit 2025.
Borxhi kombëtar pritet të mbetet i qëndrueshëm në nivelin 47.1% të PBB-së, ndërsa deficiti parashikohet të bjerë në 3.3% të PBB-së këtë vit dhe në 2.8% vitin e ardhshëm, shtoi ai. / Reuters
Postimi ” Malta ul taksat për prindërit, në përpjekje për të ringjallur normën e lindjeve vendase ” eshte marre nga Revista Monitor.
