Qeveria e Maqedonisë së Veriut miratoi planet për një kredi prej 500 milionë eurosh nga Hungaria, që pritet të shërbejë si një nxitje e rëndësishme për Prodhimin e Brendshëm Bruto (PBB) të vendit.
Në korrik, u raportua se kryeministri i Maqedonisë së Veriut Hristijan Mickoski, kishte arritur një marrëveshje me kryeministrin hungarez Viktor Orbán, për një hua prej 500 milionë eurosh që do t’i jepte Hungaria Shkupit. Kjo shumë përfaqëson gjysmën e vlerës prej 1 miliard eurosh që Mickoski u zotua të siguronte pas fitores së tij zgjedhore më 8 maj.
Mickoski, nga partia e djathtë në pushtet VMRO-DPMNE, njoftoi se kredia do të kishte ndikim pozitiv në ecurinë ekonomike në tremujorin e katërt të këtij viti dhe në tremujorin e parë të vitit 2025.
Paketa e kredisë, e cila përfshin 250 milionë euro për komunitetet e biznesit dhe 250 milionë euro për investime kapitale në komuna, shihet si faktor zhvillimor për ekonominë, tha Mickoski.
Kushtet e kredisë përfshijnë një normë interesi prej 3.25%, një periudhë faljeje trevjeçare dhe një periudhë 12-vjeçare të shlyerjes, të cilën Mickoski e cilësoi si shumë të volitshme në krahasim me kushtet e tregut.
“Kjo së shpejti do të paraqitet në Kuvend dhe pres që procesi të përfundojë deri në fund të muajit”, tha Mickoski.
Ai shtoi se kredia do të ofrojë mbështetje thelbësore si për sektorin privat, ashtu edhe për qeveritë vendore, duke ndihmuar në nxitjen e rritjes ekonomike.
Mickoski gjithashtu vuri në dukje se prodhimi industrial në Maqedoninë e Veriut ishte rritur me 3.8% në korrik, pas disa muajsh rënie, duke shënuar ndryshim pozitiv për ekonominë. Mickoski tha se rritja ekonomike është një shenjë pozitive pas një periudhe stanjacioni.
Mediat hungareze kanë raportuar në korrik se Hungaria do të japë një kredi “miqësore” prej 500 milionë eurosh për Maqedoninë e Veriut, duke vënë në dukje se norma e interesit për kredinë është më e volitshme se norma me të cilën vetë Hungaria financon borxhin e saj.
Postimi ” Maqedonia e Veriut kredi prej 500 mln eurosh nga Hungaria për të nxitur ekonominë ” eshte marre nga Revista Monitor.
