Shqipëria ka shkëmbyer më pak mallra me Italinë këtë vit, të paktën në një drejtim, atë në vlerë të shpenzuar për shitjen dhe blerjen e tyre.
Të dhënat nga Institut i Statistikave tregojnë se nga 1.35 miliardë euro eksporte në harkun e muajve janar-gusht 2022-shit, shifra ka rënë në 1.2 miliardë euro këtë vit. Ecuri e ngjashme paraqitet edhe në kahun tjetër, atë të importeve të cilat janë rrudhur me rreth 50 milionë euro krahasuar me një vit më parë.
“Nga viti 2021 shkëmbimet tregtare mes Shqipërisë dhe Italisë ishin vetëm 1.2 miliardë euro për t’u rritur në mbi 2 miliardë gjatë 2022-shit. Do të thosha se kjo rënie e lehtë përgjatë këtyre muajve të këtij viti ka ardhur si reflektim i zhvlerësimit të euros përballë lekut”, tha Antonio Nidoli, president i Dhomës Italiane të Tregtisë.
Ndërkohë Shqipëria vijon të jetë “toka e premtuar” për sipërmarrësit italianë. Të dhënat nga Instituti i Statistikave tregojnë se nga 2 mijë e 675 ndërmarrje në 2021-shin, numri i bizneseve italiane në vend u rrit në 2 mijë e 870 vitin e shkuar.
“Kjo tregon se Shqipëria vijon të jetë një vend që josh sipërmarrësit italianë. Ne si Dhomë tregtie po mundohemi të sjellim sa më shumë ndërmarrje italiane me gjithë se kemi probleme me fuqinë punëtore”, shtoi Nidoli.
Për presidentin e Dhomës Italiane të tregtisë, Antonio Nidoli forumi ekonomik i zhvilluar në Itali me kryeministrin Rama dhe përfaqësues të institucioneve, do t’i japë një tjetër hov kë saj ecurie.
“Forumi Ekonomik është një instrument shumë i nevojshëm për të kuptuar nevojat që janë në Shqipëri dhe për të bashkërenduar një strategji zhvillimi për vendin tuaj. Jam i sigurt që në fillim të vitit të ardhshëm do të shohim investime të reja italiane, veçanërisht në bujqësi, turizëm dhe atë energjetik”, shtoi ai.
Italia vijon të mbetet një ndër partnerët kryesor të Shqipërisë në drejtimet tjera ekonomike. Pas Holandës, fqinji përtej Adriatikut përbën vlerën më të lartë të investimeve të huaja me 109 milionë euro në gjysmën e parë të vitit. Me këtë ecuri Italia, renditët ndjeshëm më mirë se Turqia, Austria apo Shtetet e Bashkuara të Amerikës.
Burimi: A2 CNN
