Kuvendi i Kosovës e ka miratuar Ligjin për Buxhetin e vitit 2026. Me 62 vota pro, 36 kundër dhe asnjë abstenim. Vlera e buxhetit është rreth 4 miliardë euro.
Në Kuvendin e Kosovës është miratuar buxheti i vendit për vitin 2026 edhe në lexim të dytë.
Projektligji nr. 10/L-001 mbi ndarjet buxhetore për Buxhetin e Republikës së Kosovës për vitin 2026 u miratuar me 62 për, 36 kundër, asnjë abstenim.
“Me 62 vota për, 36 kundër dhe asnjë abstenim Kuvendi miratoi Ligjin nr. 10/L-001 mbi ndarjet buxhetore për Buxhetin e Republikës së Kosovës për vitin 2026. Falënderoj të gjithë deputetë për kontributin e dhënë”, tha kryetarja e Kuvendit të Kosovës, Albulena Haxhiu.
Ky buxhet e përmban edhe pagën e 13-të për punëtorët e sektorit publik që paguhen nga buxheti, pagë e cila do t’u paguhet sa po të hyjë në fuqi Ligji i Buxhetit, kishte deklaruar Kurti ditë më parë gjatë mbledhjes së Qeverisë.
Buxheti 2026, sipas kryeministrit Albin Kurti përmban edhe rritjen e shtesës për përvojën e punës nga 0.25 % në 0.50 %, për 15 vitet e para.
Buxheti për vitin 2026 është paraparë të jetë 4 miliardë euro, prej të cilave 3.64 miliardë janë të hyra, ndërsa pjesa tjetër do të mbulohet me kredi dhe me deficit.
Ndërkohë që përfaqësuesit e opozitës kanë votuar kundër pasi që amendamentet e tyre nuk janë përfshirë në buxhet.
Shefi i GP të PDK-së, Arian Tahiri, ka thënë se buxheti siç është paraqitur ka shumë defekte.
Ka theksuar se ndryshime nuk janë bërë as në mes të dy leximeve dhe ka thënë se PDK-ja i tërheq amendamentet e propozuara që nuk morën mbështetje në Komisionin për Buxhet.
Shefja e Grupit Parlamentar të Lidhjes Demokratike të Kosovës (LDK), Jehona Lushaku, ka thënë se nuk do ta përkrahin buxheti. Amendamentet e kësaj parti janë hedhur në votim edhe në seancë por nuk kanë marrë përkrahje.
Ministri i Financave Hekuran Murati, ka thënë se buxheti për vitin 2026 është i përkohshëm dhe emergjent dhe se ai do të rishikohet e ndryshohet me prioritete e Qeverisë të reflektuara në të.
Murati ka thënë se amendamente nuk kanë pasur mundësi që të propozojnë as ministrat që e kanë marrë detyrën.
“Ky është një buxhet i përkohshëm emergjent, për këtë arsye ne si qeveri nuk u kemi dhënë hapësirën, madje as ministrave që kanë marr dikasteret e tyre që të bëjnë ndryshime, duke konsideruar që nuk kemi shumë kohë për të bërë ndryshimet e nevojshme dhe cilësore dhe që pastaj ato të mos reflektojnë me probleme gjatë rrugës”.
Postimi ” Miratohet buxheti i Kosovës për vitin 2026, rreth 4 miliardë euro ” eshte marre nga Revista Monitor.
