Nga tërmeti, pandemia dhe kriza e çmimeve… emëruesi i përbashkët i tri krizave që Shqipëria u përball, ishte se vendi ka nevojë për një model të ri ekonomik. Në mbledhjen vjetore të Qendrës së Ekselencës në Financë, organizuar në ambientet e reja të Bankës së Shqipërisë në ish-hotel Dajtin e restauruar, guvernatori Sejko nënvizoi se orientimi drejt “së gjelbrës”, është mënyra më e mirë që ekonomia shqiptare të përmirësojë veten.
“Sektori financiar luan një rol kyç në lidhje me ndryshimet klimatike, të cilat kanë një kosto të lartë, dhe janë shumëplanëshe. Ato janë një burim rreziku për institucionet financiare, por nga ana tjetër, nuk ka zhvillim të qëndrueshëm pa financim të qëndrueshëm dhe këtu sektori bankar mund të luajë një rol udhëheqës për kompanitë në Shqipëri”, tha Guvernatori Sejko.
Ministrja e Financave dhe Ekonomisë, Delina Ibrahimaj vlerësoi se sistemi i ri ekonomik është ajo që i duhet Shqipërisë, aty ku vlera e produkteve, materialeve dhe burimeve mbahet për sa më shumë kohë të jetë e mundur dhe humbjet minimizohen.
“Ndryshimi i klimës po bëhet një kërcënim potencial për të gjitha ekonomitë tona. Në fakt, kriza e fundit që ne kaluan na dhanë disa mësime dhe mësimi kryesor që morëm ishte se sa e rëndësishme është që të punojmë për një ekonomi të qëndrueshme për të përballuar sa më lehtë krizat”, tha Ibrahimaj.
E pranishme në takim, Drejtoresha e Qendrës së Ekselencës në Financë, Jana Repanšek, kërkoi mbështetjen e sistemit bankar si mënyrë që vendi t’i largohet modelit të prapambetur dhe joproduktiv ekonomik për të shkuar tek ai i përparuar që prodhon.
Burimi: A2 CNN
