Skemat mbështetëse për bujqësinë përmes Agjencisë për Zhvillimin Bujqësor e Rural vijojnë të mbështetin fermerët për të zgjeruar aktivitetin e tyre në Shqipëri. I tillë është edhe rasti i Xhemalit në Cërrik. Ai është një nga shembujt e fermerëve që kanë përfituar nga Skema e naftës pa taksa, ujitjes me pika, si dhe skema e QTTB – ve mbi plehrat kimik dhe ka zgjeruar sipërfaqet e mbjella me drufrutorë. Ministrja e Bujqësisë dhe Zhvillimit Rural, Frida Krifca, e shoqëruar edhe nga kryebashkiaku i Cërrikut, Andi Salla dhe deputeti Damian Gjiknuri , vizituan nga afër pemëtoren ku ai kultivon pjeshkë, mollë dhe nektarina në një sipërfaqe prej 5 hektarësh.
“Xhemali është kthyer nga emigrimi për t’u marrë me bujqësi në vendin e tij dhe është përfitues për të tretin vit radhazi nga skema e mbështetjes me naftë, e vendosur në dispozicion nga qeveria shqiptare për fermerët”, u shpreh Krifca. Ministrja tha se fokus i politikave tona është mbështetja e fermerëve. “Masa e mbështetjes me naftë synon uljen e kostove për fermerët në mbjelljen e kulturave të ndryshme bujqësore, me qëllim nxitjen e prodhimit vendas dhe rritjen e eksportit”, tha ajo. Ministrja e cilësoi revolucion investimin në ngritjen e rrjetit të qendrave të grumbullimit për prodhimet bujqësore. “Qarku i Elbasanit duhet të ketë qendrat e veta pasi është një zonë me kapacitet të lartë prodhues. Lajmi i mirë është që bashkia e ka ngritur këtë qendër grumbullimi dhe detyra e kryetarëve të bashkive është që të krijojnë stimujt e funksionimit të organizimit”, tha Krifca.
Gjithashtu vuri në dukje Krifca, në mbeshtetje të fermerëve eshtë dhe Portali i fermerit, aplikacioni ku gjendet i gjithë informacioni që i duhet një fermeri, mbi çmimet, pikat e grumbullimit si edhe mbi skemat mbështetëse. Xhemali tregoi se, ka një sipërfaqe prej 2 ha të mbjella me mollë dhe 2.5 ha të mbjella me pjeshkë. “Kam kultivuar mollë që prej 20 vitesh, ndërsa pjeshkë në 10 vitet e fundit, pavarësisht vështirësive nuk dua të humbas varietetet e para”, tha ai, teksa vlerësoi lehtësitë që ka perfituar nga masat mbështetëse. Ndërkohë AZHBR vijon shpërndarjen e kartave të naftës pa taksa për fermerët nga Skema Kombëtare e Mbështetjes 2023.
Masa e mbështetjes me naftë synon uljen e kostove për fermerët në mbjelljen e kulturave të ndryshme bujqësore, me qëllim nxitjen e prodhimit vendas dhe rritjen e eksportit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
