Korporata Elektroenergjetike Shqiptare po kërkon konsulencë të jashtme financiare për projektin e hidrocentralit të Skavicës. Përmes një procedure të shpallur në faqen zyrtare, KESH bën me dije se vlera e kontratës do të jetë 450 mijë euro, ndërsa specifikon detyrat që do të ketë konsulenti në drejtim të këtij projekti që e konsideron me prioritet të lartë për Shqipërinë.
Ndër të tjera, konsuleneti do të duhet të vlerësojë aftësitë financiare të KESH për të marrë kredi për financimin e këtij projekti. Po ashtu, do të duhet të kryejë një rishikim të modelit aktual financiar për këtë vepër energjetike.
Në këtë kaudër, Këshilltari Financiar duhet të zhvillojë një model financiar që vlerëson tarifat e energjisë elektrike për ndërtimin dhe funksionimin e HEC-it të Skavicës në skenarë të ndryshëm. Ndërkaq, i gjithë vlerësimi financiar i kërkuar duhet të dorëzohet pranë KESH brenda 6 muajsh nga nënshkrimi i kontratës. Sipas KESH, hidorcentrali i Skavicës synon kompletimin dhe maksimizimin e prodhimit të energjisë elektrike në Kasakdën e Drinit.
Ndërkohë, studimi i fizibilitetit i kryer disa vite më parë, solli në tavolinë 2 variante, që parashikojnë madhësi të ndryshme të digës. Alternativa A parashikon një HEC me fuqi të instaluar prej 120 MW dhe me kosto prej 308 mln euro.
Ndërkaq, sa i takon alternativës B, parashikohet ndërtimi i një HEC-i me fuqi të instaluar 210 MW dhe kosto prej 510 mln euro. Ndërkohë, në vitin 2021 Korporata Elektroenergjetike Shqiptare nënshkroi kontratën e fazës së parë me kompaninë Bechtel International, që konsistonte në kryerjen e studimeve për hartimin e projektit përfundimtar të kësaj vepre hidroenergjetike.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
