Ndërsa aktualisht subvencionohet vetëm sektori i bujqësisë, duket se qeveria shqiptare, për të përgatitur industritë për tregun e Bashkimit Europian, do të ndryshojë kurs, përmes ofrimit të mbështetjes financiare edhe për sektorë të tjerë, duke hequr dorë nga përjashtimet fiskale.
Komiteti Kombëtar i Lehtësimit të Tregtisë ka dalë në konkluzion se për këtë qëllim do të iniciohen disa studime sektoriale, për të parë hapësirat se ku është më i nevojshëm subvencionimi.
E ndërsa eksportet shtazore janë në nivele të papërfillshme, kërkohet ndihma e Bashkimit Europian për të kaluar në filtër cilësinë e tyre në mënyrë që të gjenden tregje ndërkombëtare.
Në hartën e eksporteve, blegtoria zë vetëm 0.5 për qind në sasi dhe 0.9 për qind në vlerë, shifra këto të pakonsiderueshme në krahasim me sektorët e tjerë të bujqësisë. Cilësia e produkteve dhe mungesa e certifikimit ka qenë arsyeja kryesore që ka frenuar eksportin.
Por tashmë me hapjen e negociatave me Bashkimin Europian, përmbushja e standardeve europiane të produkteve bujqësore dhe blegtorale është kusht.
Nga ana tjetër qeveria shqiptare po përpiqet të rrisë shkëmbimet tregtare me Japoninë, përmes lehtësimit të tregtisë. Referuar të dhënave zyrtare të INSTAT për vitit 2022, shkëmbimet tregtare me këtë shtet janë në nivele modeste dhe llogariten afro 60 milion euro, ndërsa në sasi fiksohen në afro 13 mijë ton.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
