Të kesh mundësinë për të punuar në distancë është bërë një nga përfitimet më të rëndësishme, në tërheqjen e talenteve për kompani në industri të caktuara.
Megjithatë, ndërkohë që puna në distancë mund t’i mbajë punonjësit të lumtur dhe të zvogëlojë kostot e biznesit, ka gjithashtu ndërlikime të mëdha për punëdhënësit.
Ekziston një rrezik i caktuar për punëdhënësit, veçanërisht në lidhje me problemet ligjore dhe financiare, paralajmërojnë ekspertët e punësimit në firmën ligjore Tan Ward.
Ku shfaqen më shumë mundësitë për punë në distancë në Europë?
Në vitin 2023, sipas Eurostat, 8.9% e punonjësve punonin në distancë, norma është pak më e lartë në 9.9% për të gjithë BE-në.
Në vitin 2023, Mbretëria e Bashkuar, Holanda dhe vendet nordike patën përqindjet më të larta të punës në distancë, sipas Oxford Economics.
Sa për qytetet kryesore, Londra, Stokholmi dhe Amsterdami kishin përqindjen më të lartë të banorëve, që punonin nga shtëpia vitin e kaluar.
Për sa i përket vitit 2024, punësimet e reja në distancë janë më të rëndësishmet në ndërmarrjet e mesme dhe të vogla (SME), kompani me më pak se 250 punonjës, në Gjermani, MB dhe SHBA, sipas raportit Global State of Remote and Hybrid Work të LinkedIn, për 12 muajt para korrikut 2024.
Industria me mundësitë më të shumta të punës në distancë duket të jetë teknologjia, informacioni dhe media, me pothuajse 35% të punëve në distancë në MB dhe më shumë se 26% në Gjermani.
Pothuajse gjysma e punësimeve të reja në kompanitë e vogla amerikane në këtë sektor, ishin gjithashtu në distancë vitin e kaluar, sipas raportit.
Cilat janë rreziqet me të cilat përballen kompanitë kur ofrojnë mundësi punësimi në distancë?
Ekspertët e punësimit në firmën ligjore Tan Ward, paralajmërojnë se ofrimi i pozicioneve në distancë, duhet të trajtohet me kujdes, pasi mund të jetë i kushtueshëm dhe të sjellë probleme për kompaninë.
Për shembull, një punonjës i vetëm, që punon në një vend tjetër, mund të çojë në detyrime shtesë tatimore të korporatës dhe probleme ligjore për punëdhënësin, duke krijuar një ‘Seli të Përhershme’, edhe nëse biznesi nuk ka një degë në atë territor.
Pra, përpara se dikush të vendosë rezidencën e tij në Itali, por dëshiron të punojë për një kompani në Francë, për shembull, të gjitha palët duhet të jenë të sigurta, që ata janë në përputhje me ligjet e një vendi të punësimit, rregulloret tatimore, kërkesat e emigracionit, mbrojtjen e të dhënave dhe shëndetin e standardet e sigurisë.
A është vërtet puna në distancë ajo që duhet për të qenë të lumtur?
Rezulton se punonjësit në të tre aranzhimet e punës (në vend, hibrid dhe në distancë) përjetojnë burnout shumë shpesh, me ritme statistikisht të ngjashme (24%-27%), sipas hulumtimit të fundit nga Gallup dhe Workhuman, duke vëzhguar tregun e punës në SHBA.
Praktikat e biznesit nga ana tjetër mund të bëjnë ndryshimin.
Një nga faktorët më të rëndësishëm duket të jetë përqendrimi në krijimin e pritshmërive të qarta.
Vendosja e objektivave realiste të performancës dhe njohja e meritave në punë, janë dy hapa të tjerë të rëndësishëm, të cilët premtojnë të rrisin mirëqenien e të gjithë punonjësve, pavarësisht se ku punojnë.
/ Shqip.al
Postimi ” “Nga nomad dixhital në makth”, si puna në distancë mund të sfidojë punëdhënësit ” eshte marre nga Revista Monitor.
