Shitjet e automjeteve elektrike janë rritur nga 1 % në 2010 në 88.9 % të totalit të automjeteve të shitura në 2024
Kalimi në opsione më të qëndrueshme transporti është një nga ndryshimet më të mëdha, që mund të bëjmë për të përmirësuar shëndetin e planetit tonë.
Kjo është arsyeja pse kaq shumë njerëz po heqin dorë nga fluturimet me distanca të shkurtra në favor të udhëtimit me tren.
Por automjetet personale janë gjithashtu burim i shumë ndotjeje.
Ndërsa disa vende po bëjnë gjëra për të trajtuar problemin, si zbatimi i zonave me emetim të ulët, Norvegjia është në rrugën e duhur për t’u bërë vendi i parë në botë, që përdor vetëm automjete elektrike.
Shitjet e automjeteve elektrike (EV) në Norvegji janë rritur nga vetëm 1 % e shitjeve totale të automjeteve në 2010, në 88.9 % në 2024, sipas CNBC.
Dhe në javët e para të këtij viti, kjo shifër është rritur edhe më shumë, në 96 % të shitjeve.
Sigurisht, ka ende shumë automjete me motorë me djegie të brendshme në rrugë.
EV përbëjnë 28 % të totalit të makinave në Norvegji (megjithëse në Oslo është 40 %).
Sidoqoftë, qëllimi i vendit për të operuar me automjete 100 % elektrike (i cili u krijua nga ligjvënësit në vitin 2017) është plotësisht i kuptueshëm.
“Ne nuk e dimë saktësisht sa do të jetë shifra derisa të mbarojë viti, por të gjithë thonë se do të jetë diku mes 95 dhe 100 %,” tha sekretari i përgjithshëm i Shoqatës Norvegjeze të EV.
“Në kohë si kjo kur Presidenti Donald Trump tërheq SHBA-në nga marrëveshja për klimën, mendoj se ne duhet të festojmë arritjet tona.”
Por, si e ka arritur Norvegjia këtë ndryshim?
Në vend që të imponojë masa ndëshkuese për drejtuesit e automjeteve jo elektrike, zëvendësministri i transportit i Norvegjisë tha se politikat ishin krijuar për të mbështetur përdorimin e automjeteve elektrike.
Stimujt përfshijnë përjashtimin nga TVSH-ja, taksat më të lira të parkimit dhe rrugëve, si dhe aksesin në korsitë e autobusëve.
Për më tepër, qeveria investoi në infrastrukturën e karikimit dhe shumë shtëpi norvegjeze tani mund të karikojnë makinat e tyre.
Vlen të përmendet se Norvegjia është një vend i pasur, kështu që mund të përballojë kostot e subvencionimit të ërdorimit të EV, si dhe eksporton shumë naftë bruto dhe gaz, që do të thotë se energjia atje është e lirë.
Megjithatë, ekonomisti Rico Luman tha se “Norvegjia është një pararendëse globale” dhe mund të japë shembull që vendet e tjera mund ta ndjekin.
Për kontekst, të dhënat e industrisë tregojnë se 20 % e regjistrimeve të makinave të reja në Mbretërinë e Bashkuar në 2024 ishin për EV, por në SHBA, vetëm 8.1 % e shitjeve ishin EV.
/ Time Out, CNBC, Shqip.al
Postimi ” Norvegjia do të bëhet vendi i parë që përdor vetëm automjete elektrike ” eshte marre nga Revista Monitor.
