Qeveria nuk e prishi traditën e të shpenzuarit një pjesë të mirë të parave në fund-vit as kësaj radhe. Gati 50 miliardë lekë apo 430 milionë euro dolën nga arka e shtetit vetëm në dhjetorin e vitit të shkuar, fonde që institucionet i përdorin për të mos u djegur. Referuar të dhënave nga Ministria e Financave dhe Ekonomisë, kjo shifër është gati sa gjysma e totalit të shpenzimeve kapitale gjatë 2022-shit.
Ndërkohë, për herë të parë që nga periudha e pandemisë, me gjithë çmimet më të larta në tre dekada, të ardhurat u frenuan dhjetorin e vitin të shkuar. Paratë që hynë në arkën e shtetit u ulën në 50 miliardë lekë nga 51.75 miliardë në dhjetorin e vitit 2021 duke shënuar kështu një rrudhje me 3.5 për qind.
Emigracioni i lartë i cili veç të tjerash po prodhon krizë në konsum vlerësohet si arsyeja kryesore.
Marrë në harkun e 12 muajve, nivel i të ardhurave vitin e shkuar ishte më i larti historik me gati 573 miliardë lekë nga rreth 510 miliardë në 2021-shin, duke regjistruar kështu një zgjerim me 12 për qind.
Edhe shpenzimet e përgjithshme publike u rritën gjithashtu vitin e shkuar, duke kapur shifrën e 651 miliardë lekë nga më pak se 600 miliardë në 2021-shin.
Të ardhurat dhe shpenzimet në nivele rekord bënë që bilanci ekonomik i vendit vitin e shkuar të mbyllej me një deficit prej 78.2 miliardë lekësh. Ky tregues është 8.4 për qind më i ulët se ai në vitin 2021.
Burimi: A2 CNN
