Oda Ekonomike e Kosovës ka kërkuar ndërhyrje të menjëhershme fiskale, në mënyrë që të ndalohet rritja e çmimit të derivateve të naftës.
Oda Ekonomike e Kosovës ka dhënë disa propozime për “t’i mbrojtur bizneset dhe qytetarët”, duke parë rritjen e çmimeve të naftës në Evropës.
OEK tha se propozimet e saj do ta frenonin rritjen e çmimeve.
“Duke parë rritjen e çmimeve të naftës në Evropë për shkak të zhvillimeve të fundit gjeopolitike, Oda Ekonomike e Kosovës kërkon ndërhyrje të menjëhershme fiskale për të mbrojtur bizneset dhe qytetarët”.
Oda Ekonomike propozoi uljen e tatimit mbi akcizën për derivatet e naftës dhe lirim të përkohshëm ose ulje të normës së TVSH-së për to.
“Këto masa do të ndihmonin në uljen e çmimeve, lehtësimin e barrës financiare dhe stabilizimin e tregut. Masa të ngjashme janë aplikuar tashmë në disa vende të BE-së dhe rajonit për të frenuar rritjen e çmimeve dhe për të mbrojtur qytetarët”, thuhet në postimin e OEK.
Këto masa, sipas OEK, do të kontribuonin në uljen e çmimeve për bizneset prodhuese dhe qytetarët, duke lehtësuar barrën financiare dhe duke stabilizuar tregun.
“Tatimi mbi vlerën e shtuar është një tatim i konsumatorit dhe i kombinuar me akcizën, I cili ka ndikim të drejtpërdrejtë në çmimin më të ulët final të karburantit. Vlen të theksohet se masa të ngjashme kanë filluar të zbatohen në disa vende të Bashkimit Evropian dhe të rajonit, me qëllim frenimin e rritjes së mëtejshme të çmimeve, e cila krijon vështirësi për bizneset dhe rrit rrezikun e varfërisë për qytetarët”.
Rritja e çmimeve të derivateve pas shpërthimit të luftës në Lindjen e Mesme po reflektohet përherë e më shumë edhe në tregun e Kosovës.
Sipas Shoqatës së Naftëtarëve, çmimet e naftës varësisht nga kompanitë sillen nga 1.53 deri 1.60 euro për litër, ndërsa i benzinës nga 1.34 deri 1.38 euro për litër.
“Çmimet po ndryshojnë në varësi të kompanive, ku nafta shitet nga 1.53 deri në 1.60 euro për litër. Ndërkohë, benzina kushton nga 1.34 deri në 1.38 euro për litër. Çmimi i naftës me shumicë aktualisht është rreth 1.54 euro për litër”.
Më 5 mars ka hyrë në fuqi vendimi i Ministrisë së Tregtisë, Industrisë e Ndërmarrësisë (MINT) për caktimin e marzhës tregtare.
Vendimi përcakton marzhë të fitimit prej 2 cent për shitjet me shumicë dhe 12 centë për shitjet me pakicë.
Ministrja Mimoza Kusari-Lila, ka njoftuar se nga dita e enjte do të hyjnë në fuqi çmimet e reja maksimale për derivatet e naftës në treg.
Sipas saj, bazuar në të dhënat e importit të ditës së fundit, çmimet e derivateve kanë shënuar rënie.
“Importi është realizuar me çmimin 1.40 euro për litër për naftën dhe 1.22 euro për litër për benzinën”, kishte deklaruar ajo.
Duke u bazuar në vendimin në fuqi për marzhën e fitimit, ajo bëri të ditur se çmimi maksimal i lejuar në treg nuk mund të jetë më i lartë se:
- Nafta: 1.54 euro për litër
- Benzina: 1.36 euro për litër
Kusari-Lila u ka bërë thirrje qytetarëve që të raportojnë çdo parregullsi në tregun e derivateve përmes numrit pa pagesë 0800 11000.
Ndërkohë, Inspektorati Qendror i Mbikëqyrjes së Tregut ka njoftuar se është duke realizuar mbikëqyrje intensive lidhur me zbatimin e vendimit për rregullimin e përkohshëm të çmimeve, me qëllim mbrojtjen e konsumatorit dhe garantimin e konkurrencës së ndershme në treg.
Sipas këtij institucioni, në bashkëpunim me Administratën Tatimore të Kosovës po analizohen të dhënat lidhur me çmimet e importit dhe ato të ekspozuara për konsumatorët në tregun vendor.
Postimi ” Oda Ekonomike e Kosovës propozon dy masa për frenimin e çmimeve të naftës ” eshte marre nga Revista Monitor.
