Pavarësisht nivelit të lartë të vjedhjeve të energjisë, Operatori i Shpërndarjes së Energjisë Elektrike ka mundur të faturojë një sasi të vogël të tyre. Sipas të dhënave zyrtare nga Enti Rregullator i Energjisë, të siguruara nga TV , për vitin 2022 janë faturuar si dëm ekonomik 25 215 mWh energji, ndërkohë që niveli i vjedhjeve është shumë herë më i lartë.
Për 8-mujorin e vitit që lamë pas u vodhën 338 096 mWh energji, ndërkohë që ndonëse shifra vjetore nuk është publikuar ende, tregon qartë se vetëm një sasi e vogël e saj iu shit klientëve si dëm ekonomik. Prej vitit 2020, kushdo që vjedh energjinë elektrike penalizohet me ‘gjobë kilovatësh” apo thënë ndryshe, sasia e energjisë e konsumuar në formë të paligjshme, konvertohet në lekë dhe faturohet.
Rregullorja i jep të drejtë çdo përdorues të rrjetit për t’u ankuar pranë Operatorit të Sistemit të Shpërndarjes apo Entit Rregullator të Energjisë, në rast se kundërshton faturën e dëmit ekonomik të vendosur nga OSSH, ose pretendon se kjo e fundit nuk ka ndjekur dhe zbatuar rregulloren.
Ndërkaq, niveli i lartë i vjedhjeve të energjisë, që përfshihet te humbjet joteknike i kushton buxhetit të Koproratës Elektoroenergjetike Shqiptare miliona euro, duke marrë në konsideratë çmimet e larta me të cilin blihet energjia. Kjo faturë rritet edhe më tej për mbulimin e humbjeve totale, ku futen edhe humbjet teknike për shkak të rrjetit të amortizuar, që janë edhe më të larta se vjedhjet.
Ola Mitre/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
