Ndonëse ka hyrë në fuqi në muajin nëntor 2023, ligji “Për fondet e pensionit privat” ende nuk po zbatohet në realitet, pasi po plotësohet me aktet nënligjore përkatëse. Së fundmi, Autoriteti i Mbikëqyrjes Financiare (AMF) ka nxjerrë për konsultim publik rregulloren “Për përcaktimin e penaliteteve të zbatuara në rastin e tërheqjes së parakohshme nga fondi i pensionit privat”.
Në nenin 4 të këtij dokumenti, përcaktohen masat e penaliteteve. Shoqëria administruese i mban individit jo më shumë se 15% të aktiveve të tërhequra, për çdo tërheqje të parakohshme të kryer në periudhën kohore nga data e kontributit të parë, deri në 5 vjet, përfshirë edhe vitin e 5-të. Kjo masë penaliteti do të zbatohet për shoqëritë administruese të cilat aplikojnë një tarifë vjetore administrimi deri në 1.5 % të vlerës neto të aktiveve të fondit. Në rastet kur tarifa vjetore e administrimit është mbi 1.5 % deri në 2.5% të aktiveve, masa e penalitetetit do të jetë jo më shumë se 10% e aktiveve të tërhequra.
Nga ana tjetër për çdo tërheqje të parakohshme të kryer në periudhën kohore që fillon pas 5 vitesh deri në 10 vjet nga data e kontributit të parë, përfshirë edhe vitin e 10-të, penaliteti do të jetë jo më shumë se 10% e aktiveve të tërhequra. Në rastet kur tarifa vjetore e administrimit është mbi 1.5 % deri në 2.5% të aktiveve, masa e penalitetetit do të jetë jo më shumë se 5% e aktiveve të tërhequra.
Në këtë rregullore përcaktohen edhe mënyrat e llogaritjes së penalitetit, si dhe detyrimet e për informimin e klientit nga ana e shoqërisë administruese. Në nenin 7, pika 2, theksohet se, me marrjen e kërkesës për tërheqje të parakohshme nga ana e anëtarit të fondit të pensionit, shoqëria administruese duhet t’i shpjegojë qartë me shembuj me shkrim, pasojat financiare që i shkaktohen nga përfundimi i anëtarësisë dhe tërheqja e parakohshme nga fondi i pensionit privat.
Ndërkohë, anëtarit i lind e drejta të mos paguajë penalitet në rastin e tërheqjes së parakohshme, nëse shoqëria administruese nuk e ka informuar për kushtet dhe masën e penalitetit, sipas parashikimeve të ligjit dhe kësaj rregulloreje.
Ligji i ri “Për fondet e pensionit privat” synon, ndër të tjera, nxitjen e pjesëmarrjes së qytetarëve në skemë nëpërmjet incentivave fiskale. Kufiri maksimal mujor i përjashtimit tatimor rritet deri në nivelin e pagës minimale të miratuar, që aktualisht regjistrohet në 40 mijë lekë në muaj. Nga kjo incentivë, shuma e kontributeve e përjashtuar nga tatimet arrin deri në 480 mijë lekë në vit ose 140% më shumë krahasuar me pragun që ishte caktuar në ligjin e vjetër prej 200 mijë lekësh.
Sipas të dhënave më të fundit të disponueshme nga AMF, gjatë periudhës janar-shtator 2023, në tregun e pensioneve private ushtruan aktivitetin e tyre pesë fonde. Tregu regjistron një total asetesh neto prej 6.5 miliardë lekësh dhe një rritje në masën 13.75% krahasuar me fundvitin 2022. Numri i anëtarëve në fondet e pensioneve private në fund të shtatorit 2023 rezultoi 38 mijë anëtarë.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
