Elisabeta Dosku/
Borxhi i brendshëm i garantuar i qeverisë deri në fund të muajit Mars, regjistrohet në vlerën e afro 16 miliardë lekëve.
Të dhënat e detajuara nga regjistri i borxhit për tremujorin e parë të vitit, tregojnë se në borxhin e garantuar të qeverisë, përfshin 3 garanci shtetërore të dhëna që nga viti pandemik 2020 deri në vitin 2022.
Konkretisht bëhet fjalë për garancinë shtetërore për pagat, miratuar në vitin 2020 si një instrument për t’iu dhënë mundësi bizneseve të prekura nga COVID 19 që të merrnin kredi për të paguar pagat e punonjësve të tyre, ne vlerën e 11 miliardë lekëve.
Po ashtu po në vitin 2020 u miratua një tjetër garanci sovrane me vlere 15 miliardë lekë me bankat tregtare, për garantimin e huamarrjes së tregtarëve ose shoqërive tregtare për të mundësuar financimin e nevojshëm për rimëkëmbjen e aktivitetit tregtar, i cili pësoi goditje për shkak të pandemisë.
Garancia e tretë shtetërore është miratuar në vitin 2022, me vlerë prej 3 miliardë lekësh në favor të 4 bankave tregtare në vend, për financimin e subjekteve që tregtojnë me shumicë produkte ushqimore bazë, për shkak të situatës së krijuar nga lufta në Ukrainë, ku vendi pati probleme me zinxhirin e furnizimit ushqimor. Këto garanci janë përdorur në masë të konsiderueshme nga biznesi. Dy garancitë e fundit sovrane kanë afat deri në vitin 2025.
Ndërsa pjesa tjetër e borxhit i përket huamarrjes nga Korporata Elektroenergjitike Shqiptare, Operatori i Shpërndarjes së Energjisë Elektrike dhe Enti Rregullator i Energjisë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
