Rënia e euros nuk është lajm i keq për të gjithë. Në një kohë që eksportuesit po rezultojnë si humbësit e mëdhenj nga nënçmimi i monedhës europiane, qeverisë po i lehtësohet barra në borxhin e jashtëm. Në fund të marsit totali i detyrimeve valutore ishte 5.58 miliardë euro, ndërsa monedha europiane zinte 71.6 për qind të totalit, ndjekur nga valuta e Fondit Monetar Ndërkombëtar me 13.6 për qind dhe dollari amerikan.
“Qeveria ka pasur avantazh në këtë drejtim. Rënia e euros, e cila përkthehet në rënie të interesave i ka dhënë frymëmarrje qeverisë në drejtim të borxhit të jashtëm” thotë Klajdi Bregu, pedagog ekonomie në SHBA.
Të dhënat nga Ministria e Financave dhe Ekonomisë tregojnë se në tremujorin e parë të vitit shërbimi i borxhit të jashtëm i kushtoi qeverisë shqiptare rreth 91,5 milionë euro, nga të cilat 66.2 milionë euro ishin principal dhe 25.2 milionë euro ishin interesa.
Në po të njëjtin hark kohor, zhvlerësimi vjetor i euros rezulton 3.8 për qind duke u përkthyer në gati 4 milionë euro më pak detyrime për qeverinë.
“Unë dua ta shoh si thikë me dy presa. Kjo lehtësi mund të na bëjë ne më pak të kujdesshëm. Ne mund të marrim borxh të ri, por kur ky kurs të thyhet, do të përballemi me pasoja”, thotë Bregu.
Ekspertë të ekonomisë vlerësojnë se rënia e euros duhet të shërbejë si moment ku qeveria të përpiqet të ulë borxhin publik dhe nga ana tjetër të mbështesë ata që preken negativisht.
“Rënia e euros rrezikon ta kthejë ekonominë shqiptare në vitin 1992”
Burimi: A2 CNN
