Rritja e pagave dhe mos-indeksimi i pensioneve rrezikon të fusë të moshuarit në një krizë më të thellë çmimesh. Duket si rregull i pashmangshëm pasi bazohemi në ciklin normal të inflacionit: sa herë që çmimet rriten, bankat qendrore ndërhyjnë duke rritur normat e interesit, e kjo më pas sjell më pak konsum.
Por çfarë ndodh kur rriten pagat? Konsumi gjallërohet përsëri e për rrjedhojë edhe çmimet rriten. Më të humburit dalin ata që kanë më pak.
“Është një spirale që edhe në ekonomike dhe universitete trajtohet shpesh dhe është një problematikë që duhet trajtuar me kujdes. Ashtu siç edhe ju përmblodhët ciklin e inflacionit, është një spirale që zor se rregullohet shpejt.”
Edison Zaçaj, ekspert për ekonominë
Ministrja e Financave dhe Ekonomisë, Delina Ibrahimaj e justifikoi shtyrjen në tetor të indeksimit të pensioneve me nevojën për të pasur të dhëna të reja të inflacionit.
“Kjo pasi na duhet të kemi një ecuri më të plotë të inflacionit, për të bërë një indeksim sa më të drejtë”
Delina Ibrahimaj, ministre e Financave dhe Ekonomisë
Po sa qëndrojnë këto argumente në një kohë që pensionistët janë ndër shtresat që po vuajnë më shumë presionin e çmimeve?
“Të them të drejtën nuk më bindin këto argumente. Dhënia e një shpërblimi 5 mijë lekë nga taksa për energjinë mund të barazohet me indeksimin. Mendoj se ishte një lëvizje për të marrë kohë, për të harxhuar sa më pak nga Buxheti i Shtetit.”
Edison Zaçaj, ekspert për ekonominë
Banka Botërore më herët dhe Fondi Monetar Ndërkombëtar së fundmi kanë paralajmëruar për muaj edhe më të vështirë. Ata kanë kërkuar nga qeveritë që të shtojnë mbështetjen ndaj shtresave në nevojë, si pasojë e çmimeve të larta.
Burimi: A2 CNN
