Në tremujorin e parë të vitit, qeveria qendrore dhe ajo vendore kanë rritur stokun e borxhit ndaj qytetarëve dhe bizneseve me rreth 565 milionë lekë. Referuar të dhënave zyrtare nga Ministria e Financave, stoku i detyrimeve të prapambetura në fund të vitit 2022 rezultonte në rreth 12.2 miliardë lekë, ndërsa në fund të muajit Mars 2023 ka arritur në afro 12.8 miliardë lekë.
Peshën më të madhe të stokut e mban qeveria qendrore me rreth 6.7 miliardë lekë. ndërsa borxhi i qeverisë vendore ka pësuar një rritje të lehtë, duke u regjistruar në 6 miliardë lekë në fund të muajit mars. Së fundmi ndaj pushtetit vendor është ndërmarrë një iniciativë ligjore e cila i detyron bashkitë që fondet e trashëguara nga një vit më parë t’i përdorin për të shlyer detyrimet e prapambetura. Borxhet më të mëdha i takojnë zërit të investime, ku bëhet fjalë për projekte të punëve publike për të cilat ende nuk janë bërë pagesat ndaj kompanive dhe që detyrimet arrijnë në vlerën e 4.43 miliardë lekë, ku peshën më të madhe e mbajnë bashkitë.
Në vendin e dytë për nga pesha që zënë në stokun total të detyrimeve të prapambetura renditen vendimet gjyqësore, të cilat regjistrohen në 3.5 miliardë lekë dhe kanë të bëjnë kryesisht me largime të padrejta nga puna në administratën publike apo çështje të hapura kundrejt shtetit shqiptar. Në këtë zë, qeveria qendrore zë hapësirën më të madhe.
Në tërësi, zëri kryesor që ka pësuar rritje krahasuar me fundvitin 2022, është ai i investimeve, ndërsa detyrimet për vendimet gjyqësore kanë ardhur në ulje. Në shifra të ulëta renditen zëra të tjerë, si shërbime, mirëmbajtje, sigurime shoqërore, sigurime shëndetësore, etj.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
