Inflacioni vjetor qëndroi i pandryshuar në nivelin 1.9% në muajin shkurt, ndërsa vazhdon të jetë në rënie krahasuar me nivelin prej 2.6% të një viti më parë.
Të dhënat e INSTAT tregojnë se, megjithatë, ecuria e inflacionit shfaq tendenca të kundërta për grupe të ndryshme të mallrave dhe shërbimeve.
Inflacioni i produkteve ushqimore shfaqi përsëri rritje gjatë muajit shkurt dhe arriti në 2.8%, nga 2.6% që kishte qenë për janarin. Inflacioni i grupit “Ushqime dhe pije joalkoolike” madje është lehtësisht më i lartë edhe krahasuar me një vit më parë, kur ishte në nivelin 2.7%.
Inflacioni i produkteve ushqimore ngelet shtysa kryesore e presioneve inflacioniste në ekonomi dhe kontribuoi me afërsisht një pikë përqindje, kundrejt inflacionit total prej 1.9%.
Rritje të mëtejshme shënoi edhe inflacioni i grupit “Pije alkoolike dhe duhan”, në 4.5%, nga 3.9% që ishte për janarin dhe 3.7% që ishte një vit më parë. Ky grup kontribuoi me më shumë se 0.2 pikë përqindje në inflacionin total gjatë muajit shkurt.
Rritje të mëtejshme të inflacioni shënoi edhe grupi “Argëtim dhe kulturë”, që arriti në 6.5%, nga 5.7% në janar dhe 4.9% që kishte qenë një vit më parë.
Inflacioni i grupit “Transporti” qëndron në vlera negative, kryesisht falë rënies së çmimeve të karburanteve, por me një tendencë në rritje në -2.2%, nga niveli -2.5% i janarit. Sidoqoftë, inflacioni këtij grupi ngelet në rënie nga niveli -1.9% i një viti më parë dhe ngelet një ndër kontribuesit kryesorë në uljen e inflacionit në ekonomi.
Balancimi i inflacionit në nivelin 1.9% gjatë shkurtit erdhi sidomos falë tendencës rënëse të grupeve “Veshje dhe këpucë”, “Qira, ujë, lëndë djegëse, energji” dhe “Mobile, pajisje shtëpie dhe mirëmbajtje e shtëpisë”.
Inflacioni për grupin “Veshje dhe këpucë” ra në 2.8%, nga 3.3% që kishte qenë për janarin dhe 3.4% që kishte qenë një vit më parë.
Inflacioni për grupin “Qira, ujë, lëndë djegëse, energji” ra në 0.4%, nga 0.9% që ishte për janarin dhe 2.4% që kishte qenë një vit më parë.
Inflacioni i grupit “Mobile, pajisje shtëpie dhe mirëmbajtje e shtëpisë” ra në 3.6%, nga 3.9% që ishte për janarin dhe 4.7% që kishte qenë në shkurtin e vitit të kaluar.
Statistikat tregojnë që, megjithëse në terma mesatarë inflacioni është i qëndrueshëm dhe poshtë objektivit të Bankës së Shqipërisë, ecuria e grupeve të ndryshme shfaq tendenca të kundërta dhe luhatshmëri.
Banka Qendrore parashikon që gjatë vitit 2025 inflacioni të rritet lehtë drejt objektivit prej 3%, i ndikuar nga normat më të ulëta të interesit dhe nga një zbutje e mbiçmimit të lekut në kursin e këmbimit valutor.
Postimi ” Rritet inflacioni i ushqimeve, ulet ai i qirave, veshjeve dhe mirëmbajtjes së shtëpive ” eshte marre nga Revista Monitor.
