Leximi i PMI u rrit në gusht për të tetin muaj radhazi, ndërsa pasiguria tregtare po shuhet
Aktiviteti ekonomik në Eurozonë u rrit në gusht, në një zhvillim të papritur që mbështet një konsensus në rritje se Banka Qendrore Europiane do të përmbahet nga uljet e mëtejshme të normave të interesit pas verës.
Indeksi i Menaxherëve të Blerjeve të Eurozonës HCOB (PMI), një matës i ndjekur nga afër i ndjenjës së biznesit, u rrit me 0.2 pikë në 51.1 pikë këtë muaj, shumë mbi nivelin vendimtar prej 50 që ndan tkurrjen nga zgjerimi.
Analistët e anketuar nga Reuters kishin pritur një rënie të lehtë në 50.7 pikë në të dhënat e para që nga marrëveshja tregtare e korrikut SHBA-BE, që vendosi tarifa amerikane 15 për qind për shumicën e importeve nga blloku. Rritja ishte më e forta që nga maji i vitit të kaluar dhe fitimi i tetë mujor radhazi.
Sondazhi tregoi presione më të larta inflacioniste në Eurozonë, ndërsa çmimet u rritën më shpejt se në muajin e kaluar, veçanërisht në sektorin e shërbimeve. Leximi më i mirë se sa pritej përforcoi pritshmëritë e investitorëve se BQE do t’i lërë normat e interesit të pandryshuara në takimin e ardhshëm në shtator.
Çmimet e derivateve tregojnë se tregtarët shohin vetëm një probabilitet 5% për një ulje tjetër dhe një mundësi 40% për çdo ulje të mëtejshme këtë vit, sipas të dhënave të LSEG.
“Ekonomia e Eurozonës u tregua e qëndrueshme në fillim të këtij viti përballë një mjedisi sfidues global”, tha presidentja e BQE-së, Christine Lagarde, por paralajmëroi se rritja në bllok pritet të ngadalësohet në muajt e ardhshëm.
BQE i mbajti normat e interesit të pandryshuara në takimin e korrikut pas një serie uljesh që filluan një vit më parë, duke përgjysmuar kostot e huamarrjes nga 4% në 2%.
“Me sa duket, efekti pozitiv i politikës monetare më të lirshme tejkalon efektin negativ të tarifave amerikane”, shkroi Vincent Stamer, ekonomist i lartë i Commerzbank, në një shënim për klientët. / FT
Postimi ” Rritja e papritur e aktivitetit ekonomik forcon pritshmëritë për norma të pandryshuara nga BQE ” eshte marre nga Revista Monitor.
