Ekonomia e vendit u rrit me 3.23 për qind në harkun e muajve prill-qershor, por zgjerimi nuk përfshiu të gjithë sektorët. Përkundrazi, bujqësia, sektori me të cilin punon dhe jeton gati gjysma e populllsisë ra me 0.03 për qind krahasuar me të njëjtën periudhë kohore të një viti më parë.
“Nuk duhet të shikojnë performancat e sektorit në afatshkurtër duhet të bëhen një vlerësim politikash në afatgjatë, nuk duhet parë bujqësia sot për nesër. Ndryshimet klimaterike do jenë të forta, por edhe nëse flasim për teknologjinë. Flasim për inovacion e teknologji, por nuk po shihet në bujqësi. Duhet parë sesi mund të mbështetet ky sektor jo sot për nesër, por sot për të ardhmen”, tha ekspertja Esmeralda Ballesha.
Për eksperten e bujqësisë, Esmeralda Ballesha pavarësisht subvencionimeve anemike, fermerët janë të demoralizuar nga humbjet e mëdha ndër vite, por dhe nga vështirësitë si pasojë e mungesës së fuqisë punëtore.
“Që të kesh një rritje ekonomike konstante, një sektor duhet të ketë një lloj vëmendje më të duhur. Gjithmonë kemi diskutuar që nuk ka pasur subvencione sa duhen apo politika zhvillimore. Dhe tani po paguajmë disa vendime që nuk janë marrë siç duhet”, tha Ballesha.
Ajo që e bën edhe më shqetësuese rënien e bujqësisë në tremujorin e dytë është fakti se pikërisht në këtë periudhë del në treg pjesa më e madhe e prodhimit.
Burimi: A2 CNN
