Shitjet e makinave të reja të Tesla në Europë ranë me 27,9% në maj krahasuar me një vit më parë, edhe pse shitjet e makinave tërësisht elektrike në rajon u rritën me 27,2%, ku Model Y i rishikuar i prodhuesit amerikan nuk ka shfaqur ende sinjale të ringjalljes së markës.
Shitjet totale të makinave në Europë u rritën me 1,9%, me një rritje më të madhe të makinave hibride plug-in dhe të makinave që përdorin karburante alternative, sipas të dhënave të Shoqatës Europiane të Prodhuesve të Automobilave (ACEA).
Pse është e rëndësishme
Shitjet e Tesla në Europë ranë për të pestin muaj radhazi për shkak të kalimit të klientëve tek automjetet elektrike kineze më të lira dhe, në disa raste, të protestave kundër politikave të CEO-s së Tesla-s, Elon Musk.
Pjesa e tregut europian të Tesla-s ra në vetëm 1.2% në maj nga 1.8% një vit më parë.
Model Y i rishikuar synon që të rinovojë gamën e modeleve të kompanisë, tashmë e vjetruar, ndërsa shtëpitë automobilistike tradicionale dhe rivalët kinezë prezantojnë makina elektrike me një ritëm të shpejtë mes tensioneve tregtare.
Muajin e kaluar, prodhuesit kinezë ruajtën një rritje të fortë në Europë, pavarësisht taksave të BE ndaj makinave elektrike kineze, duke shitur 65.808 automjete dhe duke dyfishuar pjesën e tyre të tregut me 5.9%, sipas të dhënave të veçanta të publikuara nga Jato Dynamics.
Shifrat
Shitjet në maj të makinave të reja në Bashkimin Europian, në Britaninë e Madhe dhe në Shoqatën Europiane të Tregtisë së Lirë u rritën në 1,11 milionë automjete, pas rënies prej 0,3% në prill, sipas të dhënave të ACEA.
Regjistrimet e kompanisë shtetërore kineze SAIC Motor dhe kompanisë gjermane BMW u rritën me përkatësisht 22,5% dhe 5,6%, ndërsa ranë me 23% për Mazda-n e Japonisë.
Vetëm në BE, shitjet totale të makinave u tkurrën me 0.6% këtë vit.
Kjo, pavarësisht rritjes së kërkesës së automjeteve elektrike, me regjistrimet e makinave me bateri (BEV), hibride plug-in (PHEV) dhe hibride-elektrike (HEV), në rritje me përkatësisht 26,1%, 15% dhe 19,8%.
Shitjet në BE të makinave BEV, HEV e PHEV së bashku përfaqësojnë 58,9% të regjistrimeve të autoveturave në maj, krahasuar me 48,9% në maj 2024.
Në mesin e tregjeve më të mëdha të BE-së, shitjet e makinave të reja në Spanjë dhe Gjermani u rritën me përkatësisht 18,6% dhe 1,2%, ndërsa në Francë dhe Itali ranë me 12,3% dhe 0,1%.
Në Britani, regjistrimet u rritën me 1.6%.
/ Reuters
Postimi ” Shitjet e Tesla në Europë bien për të pestin muaj me radhë ” eshte marre nga Revista Monitor.
