Inflacioni shpesh përdoret si njësi matëse për njohuritë ekonomike të popullatës. Njohja e saktë e termit nga një pjesë e madhe shihet si një qasje me e mirë ndaj kursimeve, investimeve dhe vendimeve të tjera që kanë të bëjnë me financat personale.
Një anketë e Bankës Qendrore të Austrisë që u zhvillua në dhjetor 2024 në 9 vende të rajonit CESEE (Bullgari, Çeki, Hungari, Poloni, Rumani, Shqipëri, Bosnjë, Maqedonia e Veriut dhe Serbi) evidentoi se afërsisht 58 % e shqiptarëve i janë përgjigjur saktë pyetjes bazë mbi inflacionin, duke e matur nivelin e asaj që quhet “analfabetizëm financiar”.
Shqipëria ka bërë përmirësim të dukshëm në krahasim me vetveten. Të dhënat tregojnë se njohuritë mbi inflacionin kanë qenë ndër më të ulëtat në rajon gjatë periudhës së monitorimit. Në vitet 2018–2020, vetëm rreth 30% e qytetarëve shqiptarë e dhanë saktë përgjigjen mbi inflacionin, një nga nivelet më të ulët.
Në vitin 2021–2022 u pa një rritje e ndjeshme, ku mbi 50% e qytetarëve e kuptuan saktë konceptin e inflacionit, por në 2024 niveli u rrit përsëri në rreth 58%. Ende më pak se gjysma e shqiptarëve nuk arrijnë të japin përgjigjen e duhur mbi nocionin bazë ekonomik (inflacionin), çka përbën një sfidë për politike- bërësit dhe institucionet financiare.
Në vendet e anketuara njohuritë më të larta për inflacionin i kishin çekët me mbi 76%, të ndjekur nga Serbët me 70% dhe polakët rreth 68%. Shqipëria kishte njohuritë më të mira në Rajonin e Ballkanit pas Serbisë, duke lënë pas Bosnjën dhe Maqedoninë e Veriut dhe Rumaninë në rajonin me të gjerë, teksa ishte në të njëjtin nivel me Bullgarinë.
Në vende si Çekia, Polonia dhe Serbia, njohuritë mbi inflacionin janë rritur ndjeshëm me kalimin e viteve. Çekia ka arritur nivelin më të lartë, me mbi 75% të qytetarëve që në vitin 2024 dhanë përgjigje të saktë për inflacionin. Serbia, gjithashtu, ka shënuar progres të dukshëm, duke kaluar nga rreth 60% në vitet e para të matjes në mbi 70% në 2024.
Polonia ndjek të njëjtin trend pozitiv, duke e ngjitur shkallën e njohurive mbi inflacionin mbi 65%, Shqipëria gjithashtu ka shënuar progres.
Në një periudhë me inflacion të lartë në Europë, mungesa e kuptimit mbi inflacionin mund të çojë në vendime financiare të gabuara dhe të rëndojë më tej situatën e familjeve. Megjithë progresin të dhënat tregojnë se Shqipëria ka ende hapësira për të përmirësuar njohuritë e popullatës.
Postimi ” Shqipëria përmirësohet në “analfabetizmin financiar”, 58% e dinë çfarë është inflacioni ” eshte marre nga Revista Monitor.
