Ministria e Ekonomisë dhe Financave Delina Ibrahimaj deklaroi se vendimi për reformën e pagave është shtyrë dhe se nuk do të aplikohet as për muajin maj. Kjo për arsye se miratimi i tetë vendimeve në Këshillin e ministrave pati diskutime dhe se do duhet më shumë kohë në dispozicion për miratim.
“Duke qenë se janë mbi 200 institucione të administratës që preken nga këto vendime dhe mbi 130 mijë të punësuar, pagat e të cilëve u miratuan që në prill, zbardhja e vendimeve merr një kohë më të gjatë. Kjo është edhe arsyeja që për të qenë më koherent dhe për të shkaktuar sa më pak vonesa në marrjen e pagave, iu kemi kërkuar të gjithë institucioneve buxhetore që të përgatisin dokumentacionin e nevojshëm me qëllim që pagat e majit, në fazën e parë të kalojnë siç ishin para se të hynte në fuqi reforma. Disa prej institucioneve që preken nga ligji që kaloi në parlament, ne vendosëm që pagat në tërësi të kalojnë siç kanë qenë në muajin maj dhe me zbardhjen e vendimeve, do të përfshijmë për dokumentacionin e nevojshëm me qëllim që shtesat mbi pagë të aplikohen qoftë për prillin dhe majin” shpjegoi ministrja e Financave Delina Ibrahimaj.
Sipas ministres së Financave paga minimale ka pësuar një rritje të konsiderueshme dhe se rritja e pagave në tërësi nuk do të ndikojë në rritje inflacioni.
“Kemi bërë një llogaritje të ofertës që po hidhet dhe sa oferta agregate reflektohet në rritje. Nuk presim të ketë një rritje inflacioni nga rritja e pagave. Oferta agregate, diferenca dhe paratë shtesë është shumë e vogël në krahasim dhe me paranë totale në qarkullim do të shihet se sa do të ndiqet kjo nga sektori privat. Në të gjitha skenarët që ne kemi parashikuar për rritjen e pagave, nuk presim të ketë ndikim domethënës në inflacion. Pasojat e krizës ende jemi duke i ndjerë” vijoi Ibrahimaj,
Më tej, ministrja shpjegoi se dhe pensionet do të indeksohen sërish, duke u bazuar në nivelin mesatar të inflacionit.
Diamila Leka/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
