Guvernatori i Bankës së Shqipërisë, Gent Sejko dhe përfaqësues të tjerë të saj zhvilluan dje një takim pune me Sebastian Sosa, Përfaqësues Rezident Rajonal për Ballkanin Perëndimor pranë FMN-së.
Në krye të takimit, Guvernatori Sejko e njohu z. Sosa me zhvillimet më të fundit ekonomike të vendit, duke u fokusuar kryesisht në ecurinë e çmimeve, zhvillimet në sistemin financiar e bankar, si dhe pritshmëritë lidhur me treguesit ekonomikë në të ardhmen. Guvernatori u shpreh se ekonomia shqiptare ka pasur një ecuri pozitive gjatë vitit 2024, ku aktiviteti ekonomik, punësimi dhe pagat u zgjeruan me ritme të qëndrueshme. Inflacioni erdhi në rënie dhe mbeti në nivele të ulëta, ndërsa treguesit e stabilitetit ekonomik dhe financiar shënuan përmirësim.
Lidhur me politikën monetare të ndjekur nga Banka e Shqipërisë, Guvernatori theksoi se qasja e saj ka mundësuar kontrollin e inflacionit pa dëmtuar trendin pozitiv të rritjes ekonomike dhe stabilitetin financiar, duke krijuar kështu bazat për një rritje të shëndetshme të ekonomisë së vendit. Ndërkohë, perspektiva e zhvillimeve ekonomike për të ardhmen mbetet pozitive dhe ekonomia pritet të rritet me ritme të qëndrueshme, si dhe inflacioni pritet të kthehet në objektivin e bankës, prej 3%, gjatë vitit 2025.
Gjithashtu, Guvernatori Sejko i prezantoi z. Sosa, Programin e miratuar së fundi nga Banka e Shqipërisë për financimin e biznesit mikro, të vogël dhe të mesëm, i cili synon të krijojë një instrument financimi për bankat tregtare që të mund të përdoret prej tyre në mbështetje të përmirësimit të aksesit në kredi.
Guvernatori shtoi se ky program është konceptuar brenda kornizës ligjore që rregullon aktivitetin e BSH-së dhe parimeve të ekonomisë së tregut, dhe ka si qëllim përmirësimin e kushteve të financimit të këtyre bizneseve, me një fokus të veçantë te ato që operojnë në sektorin e bujqësisë. Ai do të zbatohet nëpërmjet bankave tregtare që zhvillojnë veprimtari në Shqipëri dhe janë të licencuara, rregulluara dhe mbikëqyrura nga Banka e Shqipërisë. Për më tepër, banka qendrore ka vlerësuar se ky program i shërben zhvillimit afatgjatë të vendit, duke krijuar predispozita për një qasje më të mirë në kreditimin e këtyre bizneseve.
Ndërkohë, z.Sosa vlerësoi punën dhe rezultatet e arritura nga Banka e Shqipërisë në drejtim të forcimit të stabilitetit monetar e financiar të vendit. Ai u ndal te rëndësia e kthimit të inflacionit në objektiv dhe shprehu mbështetjen ndaj masave të Bankës së Shqipërisë. Një tjetër çështje e vlerësuar ka qenë edhe monitorimi i vazhdueshëm që Banka e Shqipërisë i ka bërë tregut valutor, pa cenuar regjimin e lirë të tij. Z. Sosa gjithashtu përgëzoi Guvernatorin Sejko për anëtarësimin e Shqipërisë në zonën gjeografike SEPA, si një moment historik të rëndësishëm në rrugëtimin e vendit drejt integrimit evropian.
Në mbyllje të takimit, Guvernatori Sejko dhe përfaqësuesi i FMN-së Sosa theksuan nevojën dhe rëndësinë e vazhdimit të bashkëpunimit midis dy institucioneve dhe vijimit të ofrimit të asistencës teknike në të ardhmen.
Postimi ” Takimi me Guvernatorin, përfaqësuesi i FMN Sosa vlerëson monitorimin e tregut valutor nga BSH ” eshte marre nga Revista Monitor.
