Ministri i Financave Petrit Malaj për herë të parë bëri publike zbatimin e taksës së re të pasurive të paluajtshme, që do t’i paraprijë një procesi tranzitor nga 2026 deri në 2028. Aplikimi i ligjit të ri do të nisë zbatimin në vitin 2030. Malaj tha gjithashtu se ka përfunduar hartimi i projektligjit të ri për Taksën e Pasurisë, i cili ka kaluar të gjitha fazat e konsultimit publik dhe që shumë shpejt do t’i dërgohet Këshillit të Ministrave për miratim.
Deklaratën Ministri i Financave e bëri në eventin e mbylljes së projektit “ProTax Albania”.
“Sot, ne ndodhemi në një moment kyç. Kemi një sistem të ndërtuar dhe gati për t’u dorëzuar, një projektligj të hartuar sipas standardeve europiane, një bashkëpunim të konsoliduar me partnerët suedezë, dhe një vullnet të qartë institucional për të çuar përpara drejt fazës së fundit këtë reforme.
Brenda vitit 2026, të gjitha bashkitë do të jenë të integruara në sistemin e Kadastrës Fiskale. Ky është parakushti thelbësor për çdo hap të mëtejshëm.
Në vitin 2027 do të kryhet procesi kombëtar i vlerësimit të pronave.
Ndërsa 2026-2027 do të shërbejë si periudhë tranzitore deri në aplikimin e ligjit të ri.
Në vitin 2028 parashikohet futja e vlerësimeve të bazuara në treg për ndërtesat, si dhe përmirësimi i normave dhe lehtësimeve
Dhe në vitin 2030 do të nisë zbatimi i takës mbi tokën/truall, bazuar në një sistem të plotë të integruar dhe sipas standardeve europiane.
Ky do të jetë edhe finalizimi i reformës.”
Malaj tha se ka përfunduar hartimi i projektligjit të ri për Taksën e Pasurisë, i cili ka kaluar të gjitha fazat e konsultimit publik dhe që shumë shpejt do t’i dërgohet Këshillit të Ministrave për miratim.
“Sot, ne si Ministri e Financave, në bashkëpunim edhe me Agjencinë Suedeze për Zhvillim, përmbyllim një projekt tejet të rëndësishëm, siç është “ProTax Albania” e që ka të bëjë me reformën e Taksës së mbi Pronën.
Ky projekt është i një rëndësie të veçantë dhe tërësisht në linjë me reformat që kjo qeveri po ndërmerr, edhe në kuadër të integrimit të vendit në Bashkimin Europian.
Qëllimi ynë kryesor është të garantojmë një taksim të drejtë dhe efikas të pronës në Shqipëri, si dhe të forcojmë rolin e bashkive për mbledhjen e një prej taksave më të rëndësishme, jo vetëm në rajon, por edhe më gjerë.
Zbatimi i një sistemi funksional, të unifikuar dhe sipas standardeve europiane edhe pse është një sfidë, është tërësisht i realizueshëm, ndaj dhe sot jemi këtu për të prezantuar rezultatet konkrete që kemi arritur.
E kemi nisur këtë rrugëtimin si fillim me Fondin Monetar Ndërkombëtar, duke identifikuar dhe analizuar problematikat që karakterizonin taksën mbi pronën.
Më pas, me Agjencinë Suedeze për Bashkëpunim Ndërkombëtar dhe Zhvillim / SIDA-n dhe me Administratën Tatimore të Suedisë nisëm zbatimin e projektit “ProTax Albania” për të garantuar
Reformën e taksës së pasurisë, bazuar në vlerën e tregut, për ta bërë sa më të drejtë, efektive dhe transparente, por edhe për ta kthyer në një burim kryesor të të ardhurave për njësitë e vetëqeverisjes vendore;
Krijimin e Drejtorisë së Përgjithshme të Taksës së Pasurisë, pranë Ministrisë së Financave;
Si dhe ndërtimin e Kadastrës Fiskale, si i vetmi sistem kombëtar, që unifikon të gjithë informacionin mbi njësitë e ndërtimit.
Është e vërtetë që u deshën gati 7 vjet, pas një procesi shumë kompleks, që u vështirësua jo pak, për shkak të Tërmetit të vitit 2019, por edhe Pandemisë, për të arritur sot në këtë stad ku jemi”, tha Malaj.
Sipas tij të ardhurat nga taksë e pronës në Shqipëri zënë rreth 0.3% të Prodhimit të Brendshëm Bruto, në një kohë kur vendet e Rajonit arrijnë të mbledhin të ardhura në rreth 0.8% të PBB-së.
“Objektivi ynë është që ta çojmë peshën e kësaj takse në rreth 1% të PBB-së, në linjë edhe me standardet që kanë vendet e OECD-së.
Ky objektiv është tërësisht i realizueshëm dhe ne kemi të gjithë potencialin e mundshëm për ta realizuar atë. Natyrisht duhet një bashkëpunim akoma më i madh ndëristitucional me bashkitë dhe jo pa qëllim, për vitin 2026 parashikimi i të ardhurave nga taksa e pronës është në masën 10 miliardë ose rreth 100 milionë euro, një rritje prej rreth 1.4 miliardë lekë më shumë apo 14 milionë euro më shumë se sa në vitin 2025”, pohoi Malaj.
Postimi ” Taksa e re për pronën, Malaj: Në 2028 përfundojnë vlerësimet e ndërtesave, zbatimi do nisë në 2030 ” eshte marre nga Revista Monitor.
