Qeveria ka mbledhur rreth 29.2 mld lekë nga tatimi mbi fitimin gjatë 5- mujorit të parë të këtij viti, duke shënuar rritje në raport me 2022. Kontribut në këtë drejtim duket se ka dhënë edhe taksa e jashtëzakonshme, që nisi të aplikohet këtë viti për prodhuesit e mëdhenj të energjisë. Sipas përllogaritjeve janë rreth 4 mld lekë të mbledhura pikërisht nga kjo taksë.
Pak kohë më parë ministrja e Financave dhe Ekonomisë, Delina Ibrahimaj deklaroi se nga 8 mld lekë që ka qenë rritja e tatmit mbi fitimin, rreth gjysma vjen si efekt i taksës së jashtëzakonshme.
Ligji, që parashikon taksimin shtesë të të ardhurave të realizuara nga shitja e energjisë në tregun e liberalizuar, u miratua në senacën e datës 22 dhjetor 2022, ndërkohë që efektet e tij do të shtrihen përgjatë një periudhe 2-vjeçare e më konkretisht deri në vitin 2024.
Qeveria e ka quajtur taksën kontribiut solidariteti të detyrueshëm, teksa masa e tij llogaritet mbi të ardhurat shtesë të krijuara nga shitja në treg të lirë e energjisë elektrike të prodhuar me çmim më të lartë se 8.5 lekë/kWh. Ndërkohë që, gjysma e këtyre të ardhurave shtesë do të duhet të depozitohet në buxhetin e shtetit. Ligji erdhi në një kohë kur prodhuesit që shesin energji në tregun e liberalizuar zgjeruan fitimet, si pasojë e ritjes së çmimeve në tregjet ndërkombëtare.
Gjithsesi, ligji do të jetë i zbatueshëm vetëm nëse në vitin përkatës çmimi mesatar i shitjes së energjisë në bursën hungareze është mbi 180 Euro/mWh, duke sugjeruar se në muajt në vijim të ardhurat e siguruara nuk do të jenë të larta, pasi çmimet e energjisë kanë shënuar rënie të ndjeshme.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
