Shpenzimet e familjeve po rriten shumë më shpejt se të ardhurat e tyre. Konkluzioni vjen përmes një analize që Banka e Shqipërisë u ka bërë dy zërave. Sipas Bankës, në shpërndarjen e familjeve sipas nivelit të shpenzimeve të domosdoshme të jetesës, gjatë gjysmës së parë të këtij viti, vihet re që struktura ka vijuar të zhvendoset drejt dy niveleve më të larta të shpenzimeve mujore (“50 mijë-100 mijë lekë” dhe “mbi 100 lekë në muaj”), duke reflektuar në këtë mënyrë rritjen e kostos së jetesës së familjeve për shkak të rritjes së çmimeve në vend.
Po gjatë kësaj periudhe pjesa më e madhe e familjeve shqiptare, ose 45% e tyre, vijojnë të deklarojnë të ardhura mujore në nivelin “17-50 mijë lekë”. Megjithëse kjo peshë ka rënë me 2 pp krahasuar me gjashtëmujorin e kaluar dhe me 7 pp krahasuar me një vit më parë, ajo mbetet shumë e lartë. Struktura e shpërndarjes së familjeve sipas nivelit të të ardhurave mujore, duket se ka vijuar të zhvendoset drejt niveleve më të larta si “50-100 mijë” (34% të familjeve) dhe “100-200 mijë vetëm (12% e familjeve).
Banka e Shqipërisë raporton se në sektorin shtetëror dhe në atë privat ka vijuar rritja e pagave përgjatë gjysmës së parë të vitit 2023. Në terma vjetorë, norma mesatare e rritjes së pagave arriti në 17% gjatë tremujorit të dytë të vitit, duke reflektuar rritjen e pagave në sektorin privat dhe në sektorin publik, më e ndjeshme në rastin e këtij të fundit. Në sektorin privat, rritja e pagave është shtrirë në të gjithë sektorët, por ka qenë më e theksuar në sektorin e shërbimeve.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
