Korporata Elektroenergjetike Shqiptare shpalli së fundmi fituesin paraprak Për kontratën “Përfitimi i shërbimit të evadimit të mbetjeve hidrokarbure TEC Lundrues Vlorë dhe trajtimi i tyre përfundimtar” me një ofertë 30 milionë lekë apo rreth 300 mijë euro.
Në njoftimin e bërë se fundmi fitues është RADA OIL INDUSTRY sh.p.k. Më herët në dokumente KESH sqaronte se trajtimi i mbetjeve hidrokarbure do të ishte si efekt të vënies në punë të tyre për një sasi konsumi karburanti prej 25 mijë tonë.
“Grupi i punës ka marrë në konsideratë të dhënat teknike të shfrytëzimit të kryera nga kompania Renco s.p.a dhe nga analiza e mësipërme rezulton që sasia e mbetjeve hidrokarbure që do të prodhohet në funksion të konsumit të lëndës djegëse do të jetë: 0.0226297074 m3 /ton. Shoqëria KESH sh.a do të furnizoj sasinë e lëndës djegëse prej 25,000 ton për funksionimin e aseteve gjeneruese” thuhet në dokument.
I njëjti sqaronte se mbetjet hidrokarbure të lëndës djegëse grumbullohen në një depozitë për secilën anije. Secila anije ka një kapacitet rezervuari prej 50 m3 mbetje të lëndës djegëse dhe kapaciteti total i mbajtjes për të 2 (dy) anijet është 100 m3.
Nga përllogaritjet historike të bëra prej kontraktorit Renco s.p.a, për një kapacitet ditor prodhimi të plotë prej 17 motorësh, mbetjet e lëndës djegëse përllogaritet 6 m3 /ditë për secilën anije dhe 12 m3 /ditë për të 2 (dy) anijet.
“Konsumi total i lëndës djegëse i të dy njësive gjeneruese termike me kapacitet të plotë është 540 ton për 24 orë funksionim. Nga kjo rezulton që për 1 ton lëndë djegëse i korrespondon sasia prej 0.0222223 m3 /ton.
Nga sa më sipër, për një prodhim të plotë përllogaritet që secila nga dy depozitat mbajtëse të mbetjeve të lëndëve djegëse të mbushet për 8 (tetë) ditë, pra nevojitet boshatisja me tanker nga operatorët e specializuar çdo 8 ditë (48 m3 secila anije)”, thuhet në dokument.
Gjeneruesit termikë
Kriza e energjisë që nisi nga fundi i verës 2021 arriti kulmin në vitin 2022 duke ekspozuar Shqipërinë ndaj çmimeve të çmendura në importe.
KESH vendosi që të merrte me qira gjenerues termikë energjie dhe në finale pas zhvillimit të procedurave konkurruese u siguruan dy gjenerues termikë lundrues. Anijet janë të vendosura në Triport të Vlorës. Këto të fundit do të prodhonin energji përmes naftës sipas nevojës. Kapaciteti i dy njësive është 110 MW.
Në një skenar për situatën energjetike gjatë 2023 të dhënat zyrtare tregonin se prodhimi i energjisë nga këto njësi do të kushtonte 165 milionë euro.
Gjeneruesit parashikohej të prodhonin 884 GWh me një kosto prodhimi prej 185 euro/Mwh diçka që nuk u materializua asnjëherë. Vlera e gjeneruesve termikë vlerësohet 15 milionë euro teksa qiraja për një periudhë 2 vjeçare llogaritej në 46 milionë dollarë./N.Maho
Postimi ” TEC-et lundrues në Vlorë, KESH shpall fituesin për kontratën e trajtimit të mbetjeve ” eshte marre nga Revista Monitor.
