Industria shqiptare e turizmit duhet t’i hedhë sytë drejt digjitalizimit për të kapërcyer në nivelin e radhës dhe për të konkurruar denjësisht me rivalët në rajon. Sipas ekspertit Ferjolt Ozuni, aktualisht bizneset shqiptare në fushën e akomodimit përdorin vetëm platforma si AirBNB dhe Booking, por kjo është vetëm maja e inovacionit që nevojitet në këtë fushë.
Sipas Ozunit, investimi në teknologji mund të rrisë shitjet e një biznesi me 30% që në vitin e parë. Kjo për shkak se faqja e internetit dhe publiciteti online shërbejnë si një agjent që punon 24 orë për të thithur të gjithë turistët potencialë.
Një tjetër element pozitiv që sjell teknologjia është edhe nxitja e formalizimit në këtë sektor. Aktualisht sipas të dhënave të INSTAT, vetëm 1 në 3 biznese në fushën e akomodimit dhe shërbimit ushqimor kanë një faqe interneti apo profil në rrjetet sociale. Por prezenca e tyre në hapësirën digjitale ndihmon këto kompani të zënë një pjesë të madhe të shitjeve online nga interneti dhe aplikacionet.
