Çmimet e larta po vijojnë të rrisin tregtinë e jashtme, të paktën në një drejtim, atë të parave të qarkulluara.
Të dhënat nga Instituti i Statistikave tregojnë se këtë fillim-vit, eksportet e mallrave shqiptare vijuan trajektoren rritëse duke kapur vlerën e 42 miliard lekëve nga 35 miliardë në janarin e 202-shit duke shënuar kështu një zgjerim me rreth 20 për qind.
Në ecurinë pozitive ndikim të konsiderueshëm kanë pasur kryesisht shitjet e energjisë elektrike pas përmirësimit të situatës hidrike në vend. Industria fasone gjithashtu ka vijuar të shtojë shitjet, ndjekur nga materialet e ndërtimit ndërsa në rënie kanë rezultuar produktet kimike e ato plastike.
Një pjesë e konsiderueshme e këtyre produkteve ka shkuar në Maqedoninë e Veriut, vend me të cilin eksportet gjatë janarit janë zgjeruar me mbi 200 për qind. Shtet e me të cilat Shqipëria ka shtuar eksportet muajin e shkuar përfshijnë edhe Greqinë apo Kosovën, ndërsa shifrat janë në ulje me Kinën, Gjermaninë dhe Italinë.
Rritje ka pasur edhe në kahun tjetër, atë të importeve, vlera e të cilave gjatë janarit arriti në mbi 58 miliardë lekë nga 55 miliardë në po të njëjtin muaj të një viti më parë.
Niveli i importeve më i lartë se i eksporteve ka bërë që bilanci i tregtisë së jashtme këtë fillim-vit të mbyllej në një deficit prej 16.2 miliard lekësh.
Burimi: A2 CNN
