Shqipëria nisi zyrtarisht zbatimin e nismës WiFi4WB, një program që synon vendosjen e pikave të Wi-Fi publik falas në 61 bashki në të gjithë vendin, në kuadër të përpjekjeve për të përshpejtuar transformimin digjital dhe për të afruar vendin me standardet e Bashkimit Evropian.
Ceremonia e lançimit u mbajt në Krujë,këtë të premte, në një nga pikat e para të instaluara, në Kalanë e Krujës, një nga destinacionet kulturore më të vizituara në vend.
WiFi4WB është pjesë e projektit EU4Digital, bashkëfinancuar nga Bashkimi Evropian dhe Qeveria Gjermane dhe i zbatuar nga GIZ. Programi frymëzohet nga iniciativa e Bashkimit Evropian WiFi4EU, e cila ka lidhur mbi 7,000 komunitete në të gjithë Evropën.
Pas zbatimit të plotë të nismës, qytetarët dhe vizitorët do të kenë akses në internet falas në sheshe, parqe, biblioteka, shkolla dhe site kulturore në të gjithë territorin e vendit.
Ambasadori i Bashkimit Evropian në Shqipëri, Silvio Gonzato, e paraqiti projektin si një instrument për forcimin e shërbimeve publike dhe për mbështetjen e integrimit digjital të vendit.
“WiFi4WB është një ide e thjeshtë me një ndikim të fuqishëm: internet falas në 61 bashki të Shqipërisë, duke krijuar akses në shërbime digjitale, informacion, mësim dhe komunikim për të gjithë. Ky projekt nuk ka të bëjë vetëm me lidhjen me internetin. Ai synon fuqizimin e komuniteteve, mbështetjen e zhvillimit vendor dhe afrimin e Ballkanit Perëndimor me Tregun Unik Digjital të BE-së,” u shpreh Ambasadori Gonzato.
Ambasadori i Gjermanisë në Shqipëri, Karl Bergner, theksoi rëndësinë e partneritetit gjermano-evropian në avancimin e transformimit digjital.
“Digjitalizimi është një nga çështjet kryesore të kohës sonë. Ai mundëson shkëmbimin, informimin dhe frymëzimin. Duke ofruar ‘internet falas për të gjithë’ në qendrat kryesore të 61 bashkive, ne po hedhim një hap të madh përpara drejt aksesit të barabartë për të gjithë qytetarët shqiptarë,” u shpreh Ambasadori Bergner.
Zëvendës Ministrja e Turizmit, Kulturës dhe Sportit, Lira Pipa, e lidhi nismën me strategjinë për zhvillimin e turizmit gjatë gjithë vitit.
“WiFi4WB do të thotë më shumë informacion dhe orientim për turistët, më shumë aksesueshmëri. Nga kjo iniciativë përfitojnë qytetarët, bizneset lokale dhe qendrat kulturore. Muzeu në Kalanë e Krujës është një nga sitet kulturore më të vizituara në Shqipëri ku vetëm një vit më parë është vizituar nga rreth 200 mijë turistë. Prioritet kryesor për ne është turizmi gjatë gjithë vitit dhe sitet kulturore mbajnë peshën kryesore të turizmit gjithëvjetor,” u shpreh Zëvendës Ministrja Pipa.
Gjatë aktivitetit u nënshkrua një Memorandum Mirëkuptimi mes GIZ dhe bashkisë përkatëse për instalimin, operimin dhe mirëmbajtjen afatgjatë të rrjetit. Drejtoresha e GIZ Shqipëri, Sonja Kurz, theksoi rëndësinë e modelit të qëndrueshëm të nismës.
“GIZ mbetet e përkushtuar të punojë ngushtë me partnerët për të ofruar zgjidhje digjitale të qëndrueshme dhe gjithëpërfshirëse në të gjithë vendin. Përmes nismës WiFi4WB, ne po sigurojmë që çdo bashki të mund të ofrojë internet falas dhe të besueshëm në hapësirat publike, duke ndihmuar në reduktimin e hendekut digjital dhe duke i bërë shërbimet thelbësore online më të aksesueshme për të gjithë qytetarët,” u shpreh Kurz.
Autoritetet vlerësojnë se nisma do të përmirësojë aksesin në arsim dhe shërbime digjitale, do të mbështesë bizneset e vogla dhe do të rrisë përvojën e vizitorëve, duke forcuar njëkohësisht turizmin lokal dhe përfshirjen sociale në të gjithë vendin.
Postimi ” WiFi4WB, internet falas në 61 bashki, fokus në hapësira publike dhe turistike ” eshte marre nga Revista Monitor.
