Mbi 10 mijë biznese kanë kaluar në filtrin e inspektimeve të Inspektoratit Shtetëror të Punës përgjatë vitit 2022. Referuar të dhënave zyrtare të siguruara nga ScanTv, 135 subjekte janë gjobitur për shkak të shkeljes së Kodit të Punës. Të dhënat tregojnë se për vitin që lamë pas, janë 24.4 % më shumë dënime kryesore me gjobë krahasuar me vitin 2021.
Vlera totale e gjobave të vendosura arrin në 28.3 milionë lekë apo afro 246 mijë euro, me një rritje me rreth 23.6 për qind krahasimisht me 2021-shin.
Kontrollet në subjekte të kryera nga ky institucion fokusohen kryesisht tek inspektimet në punë për kushte punë të denja; për hetimin e aksidenteve në punē; mbrojtje e punëmarrësve në ushtrimin e profesionit të tyre; për ligjshmëri në zbatimin e kohëzgjatjes së punës; pagesës për punë të kryer konform legjislacionit; sigurimit të çdo punëmarrësi; higjienës dhe mirëqenies në vendin e punës; punësimit të ligjshëm të fëmijëve; për të drejtat dhe detyrimet që burojnë nga kontrata individuale e punës; për marrëveshjet kolektive në punë ; Si dhe për çështje të tjera, që lidhen ngushtë me marrëdhëniet e punës si dhe sigurinë dhe shëndetit në punë që kanë qenë pjesë e punës në çdo subjekt të kontrolluar.
Rritja e masave të ndërmarra ndaj subjekteve tregon shkujdesin e tyre në drejtim të zbatimit me rigorozitet të Kodit të Punës gjë që krijon padrejtësi tek punonjësit. Në total janë inspektuar 227 mijë vende pune.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
