Ristrukturimet e kredive dhe fshirjet e kredive të humbura nga bilancet e bankave, kanë vijuar me ritëm mjaft më të ulët këtë vit se vitet e mëparëshme. Megjithatë bie në sy se ristrukturimet gjatë 2023 dominohen nga kreditë në euro të sektorit të ndërtimit.
Bankat kanë vijuar të kryejnë ristrukturime të kredive, dhe fshirje të kredive të humbura nga bilanci, bën me dije Banka e Shqipërisë, por vëllimet respektive tregojnë për një rënie të ndjeshme të tyre. Kredia e ristrukturuar gjatë gjashtë muajve të fundit ishte rreth 2 miliardë lekë ose sa 1% e fluksit të kredisë së re të periudhës dhe sa 4.2% e stokut të kredive me probleme.
Portofolet e prekura nga ristrukturimi i kredisë lidhen me kreditë në valutë për sektorin e biznesit dhe në mënyrë të veçantë me kreditë e dhëna për industrinë e ndërtimit. Forma kryesore e ristrukturimit e kërkuar nga klientët dhe e miratuar nga bankat ishte zgjatja e afatit të maturimit.
Fluksi vjetor i kredisë së ristrukturuar është zvogëluar ndjeshëm gjatë dy viteve të fundit. Kështu, vlera e kredisë së ristrukturuar gjatë gjashtëmujorit të parë të 2023-shit është sa 28% e vlerës së kredisë së ristrukturuar në të njëjtën periudhë në 2021-shin.
Procesi i fshirjes së kredive të humbura nga bilancet e bankave ka vijuar edhe gjatë gjysmës së parë të vitit 2023 dhe vlera e kredive të humbura të fshira nga bilancet ishte rreth 1 miliardë lekë. Gjatë dymbëdhjetë muajve të fundit janë fshirë rreth 3 miliardë lekë kredi të humbura dhe 2/3 e këtij vëllimi lidhet me kredi të marra nga bizneset vendase.
Vlera e kredive të fshira në periudhën e fundit ishte sa 2.4% e tepricës së përgjithshme të kredive me probleme në portofolin e bankave në fund të muajit qershor 2023, ndërkohë që për gjashtëmujorin e kaluar ky raport ishte 6.1%.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
