Nga pajisja e mobilimi i Teatrit të Ri Kombëtar, te rikostruksioni i Muzeut Historik Kombëtar, te rehabilitimi i ambjenteve të burgut famëkeq të Spaçit, te rikonstruksioni i Presidencës, ujësjellësit, rrugët e reja e deri te faza e dytë e Qendrës së Monitorimit të Trafikut.
Janë një numër i madh projektesh të reja të financuara nga buxheti i shtetit që do të nisin në vitin 2024, prej të cilave Scan Televizion ka zbardhur ato më kryesoret dhe me kostot më të larta për taksapaguesit shqiptarë.
Do të jetë pajisja dhe mobilimi i teatrit të ri Kombëtar një prej projekteve më të kushtueshëm dhe më voluminozë që do të marrë jetë vitin e ardhshëm, me një kosto totale që shkon në 1.3 miliardë lekë, apo afërisht 12 milionë euro. Restaurimi, rikonstruksioni, riformulimi i Linjës Muzeore në Muzeun Historik Kombëtar do të jetë një tjetër projekt voluminoz me kosto afërsisht 6 milionë euro, i pasuar nga Rikonstruksion i Teatrit “Aleksandër Moisiu” të Durrësit, që do të kushtojë afërisht 2.5 milionë euro.
Risi do të jetë vitin e ardhshëm edhe riksonstruksioni i burgut të Spaçit, për të cilin janë parashikuar të paguhen nga buxheti afërisht 2 milionë euro. Vitin e ardhshëm do të nisë edhe rikonstruksioni i plotë i godinës së Presidencës, projekt që parashikohet t’i kushtojë buxhetit rreth 7 milionë euro.
Gjithësesi, ndër projektet më të kushtueshëm të vitit të ardhshëm do të jetë Faza e Dytë e ndërtimit të Qendrës së Monitorimit të Trafikut, me një kosto prej 3 miliardë lekësh, apo afërisht 28 milionë euro. Sa i përket sigurisë në rrugë janë parashikuar vitin e ardhshëm edhe disa projekte për përmirësimin e sinjalistikës për Rajonin Verior, Rajonin Qendër-Perëndim, Rajonin Jugor dhe Rajonin Qendër-Lindje, secili prej tyre me kosto prej afërisht 1.8 milionë euro. Atyre do u bashkangjitet edhe projekti i eleminimit të pikave te zeza, në rrjetin rrugor kombëtar me një kosto prej afërisht 1 milionë euro.
Disa projekte të furnizimit me ujë të zonave bregdetare do të jenë gjithashtu prioritete për vitin e ardhshëm, siç është ai për zonat e investimit strategjik, Draleos, Drimadhes dhe Dhërmi, faza e dytë, si dhe rrjeti shpërndarës i furnizimit me ujë dhe kanailzimet në zonat e Fruti-Kulturës, Valiasit dhe Zall Mnerit të Ri. Këto projekte do të kushtojnë afërisht 4 milionë euro secili. Mbrojtja nga përmbytjet do të ketë gjithashtu prioritet në vitin e ardhshëm, me disa projekte në vlerën e rreth 8 milionë eurove.
Në Projektbuxhetin e vitit të ardhëm parashikohen edhe 6 projekte koncesionare, 2 për përmirësim të infrastrukturës arsimore, 3 për ndërtimin, operimin e mirëmbajtjen e disa segmenteve rrugore dhe një për Aereoportin e Sarandës.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
