Nga viti 2018 dhe deri në 2022 numri i ndërmarrjeve eksportuese dhe importuese është rritur në mënyrë progresive. Sipas shifrave zyrtare të INSTAT, gjatë vitit që lamë pas, regjistrohen në total 3.604 aktivitete që eksportojnë mallra jashtë kufijve të Shqipërisë, duke u rritur me 13,2 % krahasuar me vitin 2021. Shifra edhe pse në rritje duket e ulët në raport me potencialet që ka vendi ynë për zgjerimin e eksporteve. Në këtë sektor, pesha e ndërmarrjeve mikro, të vogla dhe të mesme, është 97 %.
Ndërsa nga ana tjetër, duke marrë parasysh edhe volumin e lartë të importeve në vend, numri i ndërmarrjeve importuese është disa herë më i lartë se atyre që bëjnë eksport, duke u regjistruar në 13.137 ndërmarrje në vitin 2022, me rritje në rreth 8,5 % krahasuar me vitin paraardhës.
Në vitin 2022, ndërmarrjet që operojnë në industri dominojnë ndërmarrjet eksportuese. Këto ndërmarrje kryejnë 80,8 % të vlerës së eksporteve, duke u rritur me 27,9 %, krahasuar me vitin 2021.
Ndërmarrjet që operojnë në tregti dominojnë ndërmarrjet importuese në vitin 2022. Këto ndërmarrje kryejnë 55,6 % të vlerë së importeve, duke u rritur me 19 % krahasuar me 2021.
Për vitin 2022, më shumë se gjysmën e eksporteve e kryejnë 100 ndërmarrjet më të mëdha (61 %), ndërsa më shumë se gjysmën e importeve e kryejnë 200 ndërmarrjet më të mëdha (55 %).
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
